“Xhamia e Namazgjasë është një stoli për qytetin e Tiranës dhe jo thjesht një objekt për besimtarët myslimanë. Lajme akoma më të mira vijnë për faktin se kjo xhami, nuk do t’u shërbejë vetëm besimtarëve, por edhe qytetarëve të Tiranës. Këtu do të kemi një parkim nëntokësor me 200 vende parkimi, i cili do të jetë i hapur për publikun”, u shpreh kryebashkiaku Veliaj, i cili bashkë me kryetarin e Komitetit Mysliman Shqiptar, Skënder Bruçaj, inspektuan sot punimet për ndërtimin e Xhamisë së Namazgjasë.
Veliaj shprehu shpresën që në vitin 2018, të kemi një objekt që vërtet i shton vlerë Tiranës. Ai përmendi edhe sulmin e djeshëm terrorist në Stamboll, duke e cilësuar ngjarjen si një tragjedi të jashtëzakonshme.
“Ajo që ndodhi dje në Stamboll nuk ka lidhje me besimin apo me ato që feja dhe besimi predikon dhe mëson në xhamitë tona. Çdo devijim prej besimit është një akt terrorist që dënohet dhe çdo devijim prej kulturës së bashkëjetesës është diçka që nuk kontribuon në qytetet tona. Në qytetin e Tiranës bashkëjetesën e marrim shumë seriozisht”, tha kryebashkiaku Veliaj.
Nga ana e tij Kryetari i Komitetit Mysliman të Shqipërisë, Skënder Bruçaj, u shpreh se kjo është një ditë e veçantë për besimtarët myslimanë të Tiranës sepse po shohim se ëndrrat dhe lutjet e tyre po bëhen realitet.
Ndërtimi i Xhamisë së Namazgjasë pritet të përfundojë në mars të vitit 2018. Xhamia ka një sipërfaqe të mbyllur prej 1200 metra katrorë dhe një sipërfaqe të hapur po aq, me dy kate parking nëntokësor, të cilat do të shërbejnë jo vetëm për xhaminë, por edhe për publikun, pasi daljet do të jenë direkt në rrugët kryesore. Gjithashtu, do të ketë edhe një qendër kulturore, një qendër mediatike, librari, etj./tesheshi.com/
