Me një status tjetër në Twitter, kryetari i Bashkisë së Tiranës, Erion Veliaj, njofton se ka ridorëzuar në gjykatë provat që lidhin një nga gjyqtaret e çështjes së pallatit 17 katësh te Diga e Liqenit me një nga aksionerët e Gener 2, kompania që po ndërton pallatin në fjalë.
“Sapo kam ridorëzuar në gjykatë kërkesën për përjashtim të trupit gjykues për digën me prova për konflikt interesi”, shkruan Veliaj.
Ai u ka bërë thirrje qytetarëve që në orën 11.00 të mblidhen para godinës së Gjykatës së Apelit Administrativ, te ish ministria e Mjedisit, në rrugën e Durrësit, për të mos lejuar ndërtimin e pallatit 17 katësh te Diga e Liqenit. /tesheshi.com/
