Në burgun e Idrizovës në Maqedoni ka vdekur një e burgosur 46-vjeçare nga Strumica. Pasi është rënduar gjendja e saj shëndetësore është thirrur ndihma e shpejtë, në mungesë të mjekut kujdestar në burg. Mjekët e ndihmës së shpejtë kanë konfirmuar se në repartin e femrave më 7 qershor kanë konstatuar vdekjen e një të burgosure.
E ndjera ka qenë e dënuar 8 vjet, dhe gjatë vuajtjes së dënimit prej vitit 2012, mbi 20 herë ka qenë e dërguar në spital për shkaqe shëndetësore. Ekipe nga institucioni Avokati i Popullit kanë inspektuar rastin në vendin e ngjarjes.
“Pas bisedave që zhvilluan me drejtorin dhe mjekun e burgut, morën deklarata nga të burgosurat që ishin së bashku në qeli me të ndjerën. Gjithashtu, mblodhëm numër të madh dokumentesh nga karta shëndetësore e të ndjerës me qëllim që të vërtetojmë gjendjen e deri tanishme shëndetësore dhe mënyrën e trajtimit se si ajo është mjekuar deri sa ishte duke vuajtur dënimin me burg”, tha Vaska Bajramovska, Zëvendëse e Avokatit të Popullit.
Në këtë qendër ndëshkuese-korrektuese ka vetëm dy mjek dhe dy infermiere, të cilët duhet të kujdesen për shëndetin e mbi 1700 të burgosurve.
Drejtori i burgut “Idrizovë” ka konfirmuar se e burgosura ka humbur jetën.
“Mëngjesin e sotshëm të gjithë dokumentet për të burgosurën e ndjerë iu janë dorëzuar Avokatit të Popullit. Ajo shumë herë është ankuar se ka pasur dhimbje në pjesën e gjoksit dhe për këtë shkak, shumë herë e kanë dërguar në Klinikat e Shkupit, por, prej atje, përsëri e kanë kthyer në burg. Ajo sot duhej përsëri që të dërgohet në Klinikë, por mbrëmë është sëmurë dhe është thirrur ekipi i ndihmës së shpejtë. Mjekët vetëm konstatuan vdekje”, tha Zhivko Pejkovski, Drejtori i burgut të Idrizovës.
Arsyeja e vdekjes do të dihen pas mbarimit të obduksionit.
Nga janari deri tani, kjo është personi i gjashtë i dënuar i cili ka vdekur në burgun më të madh të Maqedonisë.
M.Hasani – /tesheshi.com/
