Edhe pse ligji për dy gjuhët nuk u dekretua nga Presidenti i Maqedonisë Gjeorgje Ivanov, ai ka nisur të zbatohet nga ekstremistët, që në gjuhën maqedonase dhe atë shqiptare kanë shkruar një parullë “Vdekje shqiptarëve”.
Kjo parullë ka sjellë menjëherë ragimin e Tiranës zyrtare, e cila drejton gishtin tek qarqe politike pranë VRMO-së që kanë nxitur tensionin.
Në një deklaratë zyrtare, Ministria e Jashtme e Shqipërisë thekson: “Ministria për Evropën dhe Punët e Jashtme të Republikës së Shqipërisë shpreh keqardhjen e saj dhe dënon gjuhën e urrejtjes së përdorur në mbishkrime në hapësira publike në Manastir, në adresë të shqiptarëve. Nuk është hera e parë që Manastiri, qyteti i kongresit historik të gjuhës shqipe dhunohet qëllimisht e në mënyrë të papranueshme nga akte të cilat kërkojnë të mbjellin urrejtje, përçarje e të nxisin tensione mes komuniteteve.
MEPJ u kërkon autoriteteve të Maqedonisë të hetojnë dhe të venë para përgjegjesisë autorët e këtyre sulmeve, të cilat bien ndesh e cënojnë frymën e bashkëjetesës dhe harmonisë në Maqedoni e në gjithë rajonin”.
Edhe herë të tjerë kanë ndodhur parulla të tilla, por kësaj radhe Tirana zyrtare ka reaguar pasi sipas të gjitha gjasave ngjarja ndodhi menjëherë pas reagimit të Ministrisë së Jashtme ruse kundër ligjit për gjuhën shqipe.
Pra në mënyrë indirekte Tirana i është kundërpërgjigjur Moskës, duke i kërkuar të rrijë larg zhvillimeve në Maqedoni. /tesheshi.com/
