Vdekja e papritur dhe gati tronditëse e Gerti Bogdanit, 44-vjeç, ka zgjuar dhe njëherë interesin e opinionit mbi arrestet kardiake, ato që siç thonë dhe mjekët, nuk kanë shenja paralajmëruese. Në studion e Euronews Albania, mjeku kardiolog Indrit Temali shpjegoi pikërisht këtë gjë.
“Ne si kardiologë jemi pak më të mësuar me ngjarje të tilla, në mjekësi njihet si vdekja e papritur, është një temë pak e trajtuar, është mirë që komuniteti të informohet me këtë ngjarje, që ndodh dhe nuk zgjedh. Vdekja ndodh brenda një ore në një person dukshëm të shëndoshë pa sëmundje, vdekja e papritur nuk ka shenja që i paraprijnë, gjithçka ndodh brenda një ore. Shkaqet janë nga të ndryshmet, aritmitë janë 70-80 e vdekjeve të papritura, mund të ndodhë nga shkaqe të aortës, bllokim të arterieve të mushkërive, nga infarktet, nga dëmtimi i muskulit të zemrës, nga valvulat e zemrës, edhe nga patologji të kanaleve jonike që janë shumë më të holla dhe janë të përcaktuara gjenetikisht. Ka një sërë shkaqesh për vdekjen e papritur kardiake”, shpjegoi mjeku, duke përmendur më pas disa nga ato.
“Njihen bllokimet e arterieve që bllokojnë zemrën, qoftë edhe në moshat e reja për shkak të stilit të keq të jetesës. Duhani është një ves i përhapur tek të rinjtë, predispozicioni gjenetik, përdorimi i kokainës, janë shkaqe që ndikojnë në shtimin e aritmisë së zemrës. Ezaurimi fizik deh stimulimi autonomic pra adrenalina e vazhdueshme dhe mospasja e një ekuilibri mes punës dhe pushimit janë faktorë inflamatorë, e mund të na ekspozojnë në hipertension ose aritmi”.
Vdekja e politikanit të ri demokrat një ditë më parë nga arresti kardiak, shënoi tjetër rast kur goditjet në zemër tregojnë përhapje shqetësuese mes shqiptarësh, duke marrë të njohur e të panjohur, pos dhe të rinj në moshë. /tesheshi.com/
