Ka mbyllur sytë përgjithnjë një prej emrave më të mëdhenj të pikturës shqiptare, Sali Shijaku.
Autor i disa veprave ikonike, si Mic Sokoli me gjoksin në grykën e topit, apo Vojo Kushi mbi tankun fashist, ai ishte mjeshtër i skalitjes së figurës njerëzore, pa lënë pas peisazhin.
Sali Shijaku njihej njëherësh për banesën më të tërheqëse në Tiranë, një traditë e gjallë e quajtur e stilit tirons të jetës, duke qenë vetën një “tironos me rojë e degë”.
Lajmin për vdekjen e tij e ka dhënë i biri, i cili shkroi:
“Me hidhërim të thellë ju njoftojmë për ikjen nga kjo jetë të babait tonë, Piktorit të Popullit, Nderit të Kombit, Sali Shijaku . I lehtë të qofte dheu, i kushtove gjithë jetën Artit dhe Shqipërisë”, shkruan ai, duke zgjedhur si foto simbol atë të të atit me Mic Sokolin në sfond.
Prej disa ditësh, i ndjeri ishte i shtruar në spital në gjendje të rëndë shëndetësore.
Tashmë ai do jetë një kujtim, si dhe një shenjë e fortë në artin figurativ shqiptar.
Kujtohet se ai vinte nga shkolla ruse, pasi studimet e larta i përfundou në Institutin e Lartë të Arteve “I.E.Rjepin” në Shën Petërburg, pranë ateliesë së prof. Boris Vladimiroviç Joganson (piktor i njohur, president i Akademisë së Arteve Sovjetike dhe Drejtor i Galerisë “Tretjakov” në Moskë).
Tabloja e titulluar “Heronjtë e Vigut” ishte diploma e studentit Shijaku, të cilën ai e mbrojti në vitin 1962, pas kthimit nga Rusia në Institutin e Arteve, Tiranë. /tesheshi.com/
