Myftinia e Shkodrës njoftoi përcjelljen për në botën tjetër të të riut shkodran Musaen Zeneli, vrarë nga plumbat e natës së përgjakshme në Velipojë duke u gdhirë e diela.
Ai kishte ditën e parë të punës në hotelin e Gecajve, aty ku u vranë dy vëllezër nga plumbat e Ferracakajve, fqinj me hotele me njëri tjetrin, përplasur për shezlongje. 
Myftiu i Shkodrës Imam Muhamed B. Sytari, iu drejtua të pjesëmarrësve që kishin ardhur për të shprehur ngushëllimet e tyre, duke theksuar se njeriu ka ardhur në këtë botë për ta jetuar jetën e tij të përkohëshme me besim e dinjitet, për të ndërtuar e zhvilluar të mirën, jo për ta konsideruar atë si mallin më të lirë e të pavlerë!
‘Allahu të mëshiroftë, djali ynë, që po largohesh nga kjo botë, duke shpëtuar nga propaganda e mjerimi, nga statuset në fb të atyre që po e shkatërrojnë këtë vend e që sot ‘qajnë’ për ty; nga statuset populiste e të pavlera, që vlerësohen më shumë se zemra e djegur e nënës tënde, që nuk do të gjejë më rehati, sa të ketë jetë!
Allahu të mëshiroftë e të pranoftë me butësinë e faljen e Tij, e ne na udhëzoftë se shumë larg kemi devijuar rrugën’, tha ndër të tjera në fjalën e tij para faljes së namazit të xhenazes, që u dëshmua nga besimtarë të shumtë, imamë e drejtues të shoqatave bamirëse”, njofton Myftinua e Shkodrës. /tesheshi.com/
