Vendet evropiane bashkërisht duhet të formojnë një “shtyllë” brenda NATO-s, sugjeroi ministrja franceze e Mbrojtjes, Florence Parly, e kërkuar që të komentojë deklaratat e diskutueshme të Presidentit për “vdekjen klinike” të Organizatës së Traktatit të Atlantikut të Veriut.
“Kur Presidenti i Republikës përmendi vdekjen e trurit të NATO-s, nuk do të thotë vdekja e NATO-s … Askush nuk mund ta injorojë krizën që po kalon organizata”, tha ajo në Senat.
“Sigurisht, në një nivel thjesht ushtarak, gjërat funksionojnë. NATO është një mjet i fuqishëm … Por kjo nuk duhet të fshehë thelbin”, vuri në dukje Parly.
Ministrja dënoi, siç tha, “mungesën e dukshme të përpjekjeve për mbrojtje të evropianëve, ku edhe evropianët duhet të formojnë shtyllën e tyre brenda Aleancës”.
Sipas fjalëve të saj, ekziston “dyshim serioz për garantimin e sigurisë amerikane” dhe “kur është në pyetje solidariteti midis aleatëve ndërsa turqit sulmojnë pikërisht ata që luftojnë ISIS-in (militantët kurdë) në Siri”, shtoi ajo.
“Ne nuk mund të jemi të kënaqur me këtë situatë,” tha Parly, duke shtuar se Franca “do të marrë një qëndrim në samitin e NATO-s në Londër për të filluar të mendojë për të ardhmen e Aleancës.”
“Nuk ka mbrojtje evropiane pa NATO dhe anasjelltas”, përfundoi ajo.
Presidenti francez, për të cilin mbrojtja evropiane është një temë e rëndësishme, ndezi një valë kritikash brenda aleancës në fillim të nëntorit, duke thënë se NATO ishte në një gjendje “vdekjeje klinike”.
Deklarata e tij u kritikua nga kancelarja gjermane Angela Merkel dhe Presidentja e sapozgjedhur i Komisionit Evropian Ursula von der Leyen, të cilët, si shumë evropianë, janë të dyshimtë kur bëhet fjalë për aftësitë ushtarake pa Shtetet e Bashkuara. /tesheshi.com/
