Talibanët u distancuan nga raundi i ri i bisedimeve të paqes me qeverinë e Afganistanit, një ditë pasi Kabuli njoftoi për vdekjen e liderit të tyre, Mullah Omar. Talibanët thanë se nuk janë në dijeni të një procesi të tillë bisedimesh.
Një ditë më parë, qeveria afgane njoftoi se Mullah Omar kishte ndërruar jetë një një spital në Karaci, dy vjet të shkuara. Talibanët nuk e kanë konfirmuar vdekjen e tij, ndërsa Pakistani thotë se po heton.
Pakistani e ka mohuar gjithmonë praninë e Mullah Omar në këtë vend, ndërkohë që Shtëpia e Bardhë thotë se lajmi është i besueshëm.
Media njofton se talibanët tashmë kanë ngecur në bisedimet se kush do ta zëvendësojë Omar.
Një ekip prej gjashtë personash duhet të ketë mbërritur në kryeqytetin e Pakistanit, Islamabad për raundin e dytë të bisedimeve me qeverinë afgane, por deklarata e grupit hedh dyshime të forta për negociatat.
“Media po qarkullon lajme se bisedimet e paqes do të mbahen shumë shpejt në Kinë ose Pakistan”, thuhet në deklaratë por “zyra jonë nuk është në dijeni të ndonjë procesi të tillë”.
Liderët talibanë dhe pjesëtarët e këshillit të tyre religjioz (Shura) janë përfshirë në bisedime që nga e marta për të zgjedhur liderin e ri suprem, thonë korrespondentët në rajon.
Emri që ata do të zgjedhin do të jetë vendimtar, pasi do të ketë ndikim të madh në luftën dhe paqen në Afganistan sikundër edhe në vetë të ardhmen e grupit. /tesheshi.com/
