Prishtina u rikthehet protestave këtë të hënë ku shoqëria civile ka vendosur që të dalë në rrugë për vdekjen e aktivistit të Vetë vendosjes, Astrit Dehari. “Drejtësi për Astritin” do të jetë motoja e kësaj proteste që do të mbështetet nga Vetëvendosje, e që mendohet t’i bashkohen qytetarë të shumtë të bindjeve të ndryshme politike.
“Është bërë një javë nga vdekja e Astrit Deharit dhe përveç që nuk është qartësuar asgjë në lidhje me rastin, sistemi i kapur i sigurisë e drejtësisë ka ndihmuar vetëm në rritjen e dilemave që dëftojnë pamundësinë e kryerjes së një hetimi të pavarur e të drejtë që do të rezultonte me vendosje të drejtësisë.
Gjatë kësaj kohe, përkundër të pavërtetave dhe veprimeve tendencioze të pushtetit, në mesin e qytetarëve ka pasur solidarizim, si dhe mbështetje për hetim e vendim të pavarur e të drejtë”, thuhet në një deklaratë të VV-së.
Sipas saj, “nuk duhet të ndalet kërkesa për drejtësi deri në zbardhjen e këtij rasti jashtëzakonisht të rëndë, dhe deri në çlirimin e sistemit të kapur të drejtësisë dhe ndërtimin e një sistemi të pavarur, i cili angazhohet njëmend për vendosje të drejtësisë”.
Protesta do të organizohet në sheshin “Zahir Pajaziti”. /tesheshi.com/
