Nga Mensur Krasniqi
Vdekja e djeshme e Almirit 4-vjeçar nga Kumanova ka tronditur jo vetëm familjen e tij, por të gjithë shqiptarët e Maqedonisë. Ky fëmijë ndërroi jetë pas një zënke banale të ditëve më parë ndërmjet prindit të vet dhe një maqedonasi, në spitalin shtetëror të Kumanovës. Nga inati pse babai i Almirit në shenjë respekti i kishte lëshuar radhën një rasti urgjent në spital, ka filluar zënka verbale ndërmjet maqedonasit dhe atij, me ç’rast ky i fundit i nervikosur ka pritur në dalje të spitalit dhe është vërsulur me makinën e tij në drejtim të familjes shqiptare me tentativë për t’i shtypur. Nga ky sulm, prindërit ngelën të lënduar, ndërsa djali tyre Almiri akoma më shumë, duke u dërguar në Klinikën e Shkupit, pasi u gjet në rrezik për jetën. Dhe dje, djaloshi i pafajshëm 4-vjeçar nuk arriti të vijojë jetën nga goditja e rëndë që kishte marrë prej maqedonasit të tërbuar.
Ky rast ka lënduar rëndë gjithë shqiptarët në Maqedoni, ku nuk ka syresh që të paktën nuk ka shkruar ndonjë status në rrjetin social facebook për vdekjen e vogëlushit nga Kumanova. Në asnjërin nga komentet e tyre nuk mungojnë uratat për parajsë të Almirit dhe ngushëllime për familjen e tij. Ndërsa nga kritikat e qytetarëve nuk kanë shpëtuar si politikanët shqiptarë ashtu edhe ata maqedonas të cilët gjithmonë shtiren se thërrasin në bashkëjetesë ndëretnike, mirëpo asnjëra prej tyre nuk shprehë të paktën ngushëllim për familjen e viktimës.
Tragjedi tjetër sipas qytetarëve shqiptarë paraqet fakti se asnjë nga mediumet maqedonase nuk ka publikuar lajmin për rastin tragjik, vetëm se viktima është shqiptar, ndërsa vrasësi maqedonas.
Bekim Berisha- qytetar: Deri kur mendoni të heshtni o politikanë?
“I vranë dy shqiptarë në Gostivar. Dogjën prona të shqiptarëve në Gjorçe Petrov. Rrahën dhjetëra fëmijë shqiptarë. Së fundmi e vranë edhe një katërvjeçar në Kumanovë. Deri kur mendoni të heshtni o politikanë? Zoti ju sjelltë atë që e meritoni! As më pak e as më shumë, as më mirë e as më keq, VETËM ATË QË E MERITONI!!!”, ka shkruar Bekim Berisha në facebook.
Hadi Osmani, analist: LSDM si VMRO, ultranacionalistë, nuk dhanë ngushëllime për familjen e viktimës
“Vdekja e fëmijës nga Kumanova përveç se është një tragjedi e madhe po tregon edhe një anë tjetër të realitetit të errët. E para punës tregon pozitën inferiore, anashkaluese, nënçmuese të shqiptarëve të cilët cilësohen si tepricë dhe e dyta tregon edhe mos interesimin e partive opozitare maqedonase për shqiptarët në veçanti. Për të treguar se janë ndryshe nga ultra nacionalistēt e VMRO ata duhet që të dalin publikisht në krahë të kësaj familje e cila u detyrua të dhunohet vetëm se pse është shqiptare. Ngushëllime për familjarët dhe popullin tonë”, ka shkruar në profilin e tij në facebook, Hadi Osmani.
Arijanit Xhaferi, kreu i OJQ “Eco Guerilla”: Ky vrasës nuk e meriton të shohë dritën e lirisë kurrë në jetën e tij
“Në këtë Natë të Madhe, drejt jetës së përtejme në takim me Krijuesin udhëton shpirti i një fëmije 4-vjeçar që ka rënë viktimë e urrejtjes shtazarake ndaj “tjetrit”, ndaj atij që flet tjetër gjuhë, ka tjetër kulturë, beson ndryshe. Viktimë e urrejtjes që nuk le pa përfshirë as fëmijët 4-vjeçarë. Unë jam prind dhe nuk mund as ta imagjinoj dhimbjen që kanë prindërit e këtij engjëlli të vogël, sepse një lëndim i vogël i birit tim gjatë lojës më dhemb shumë, kështu që s’do them se e kuptoj dhimbjen e tyre. Nuk e kuptoj, nuk dua askush t’a përjetojë. Vrasësit që prenë jetën e këtij voglushi nuk e meritojnë të shohin dritën e lirisë kurrë më në jetën e tyre prandaj le të bëhemi bashkë dhe le të kërkojmë që ata të ballafaqohen me drejtësinë që e kanë hak”, ka shkruan në profilin e tij në fb, Arianit Xhaferi.
Visar Vishka, aktor: Asnjë medium maqedons nuk e publikoi ngjarjen tragjike të Almirit, vetëm se ishte shqiptar
“Ka ndërruar jetë fëmija 4-vjeçar pasi është shkelur me makinë me paramendim nga qelbësira. U mundova që ta gjej ngjarjen e plotë në gjuhën maqedonase, mirëpo ngaqë kryerësi i veprës penale është maqedonas ndërsa viktima shqiptarë, askush nuk e ka publikuar ngjarjen. Le ta marrin dikush nga portalet shqiptare dhe ta përkthen në gjuhën maqedonase dhe t’ju ngrihet gjaku kur ta kuptoni se ku jetojmë dhe sa është e “madhe” solidarizimi ndërmjet nesh. Paramendoni të ndodhte e kundërta, çfarë kishit bërë”, ka shkruar Visar Vishka në facebook.
Pas rastit tragjik, gjykata ka caktuar paraburgim 30 ditor për maqedonasin e tërbuar, ndërsa kryeshefi i policisë së Kumanovës dhe deputeti i BDI-së nga kjo zonë Rexhail Ismaili bën thirrje për qetësi dhe t’i lihet ligjit dhe organeve të rendit të merren me rastin. /tesheshi.com/
