Urdhëri i Mjekëve ka dalë në mbrojtje të dy bluzave të bardha të arrestuara së fundi si përgjegjës për vdekjen e një 35-vjeçareje shtatzënë dhe foshnjë së saj, ngjarje e ndodhur dy ditë më parë në maternitetin “Koço Gliozheni” në Tiranë. UMSH është shprehur se është kundër masave të cilat i quan “të parakohshme, emocionale dhe ekstreme”.
“U.M.SH.ka ndjekur me vëmendje rastin e rëndë të ndodhur në këtë maternitet. Para së gjithash ne shprehim dhimbjen e thellë dhe ngushëllimet ndaj familjarëve për këtë humbje. U.M.S.H nuk merr përsipër të japë para kohe përfumdimet mbi rastin në fjalë, të shkaktuar nga një patologji e rëndë e rallë dhe e vështirë. Në pritje të konkluzioneve të sakta dhe shkencore, për të cilat po punohet dhe ne jemi seriozisht të interesuar për to, e shohim të domosdoshme të shprehim qëndrimin tonë, ashtu siç kemi vepruar edhe herë të tjera në të tilla raste. Ne jemi kategorikisht kundër qendrimeve dhe masave të parakohshme, emocionale dhe ekstreme qëçojnë në arrestimin e mjekëve pa u provuar dhe argumentuar fajësia e tyre, pa u sqaruar nëse kemi të bëjmë me mjekim të pakujdesshëm (neglizhencë), gabim mjekësor apo mangësi të organizimit dhe bashkërendimit institucional dhe ndërinstitucional që nevojitet në të tilla raste. Masat ekstreme dhe të nxituara nuk kanë asnjë efekt dobiprurës në përmirësimin e shërbimit shëndetësor, por përkundrazi, thellojnë krizën e besimit të publikut ndaj bluzave të bardha dhe sistemit shëndetësor në tërësi. U.M.SH.është i angazhuar në ndjekjen dhe analizimin profesional dhe shkencor, hap pas hapi të kësaj ngjarjeje dhe nxjerrjen e konkluzioneve të sakta në drejtimet e theksuara më sipër”, thuhet ne reagimin e Urdhërit të Mjekëve të Shqipërisë.
Fjala është për mjekët Elidon Klosi dhe Dritan Deçka. Ndërsa viktima është Aida Çajka /tesheshi.com/
