Ashtu siç pritej, PD e ka kanalizuar politikisht vdekjen e një 17-vjeçar në kantierin e Lungomares në Vlorë, pasi automjteti me te cilin ai udhëtonte, një X6 ra në një gropë të mbushur me ujë, aty ku prej më shumë se dy vitesh po kryhen punime. Dhe, duke përfituar dhe nga fakti që familjarët e të ndjerit fajësuan pikërisht punimet e atyshme, duke theksuar se mungesa e sinjalistikës çoi në humbjen e kontrollit të automjetit, opozita e ka drejtuar gishtin e përgjegjësisë tek Rama.
“Një i ri humbi jetën dje aty, për shkak të një grope në Lungomare dhe në vend që qeveria e Edi Ramës të mbante përgjegjësi për mungesën e sinjalistikës, për punimet që vazhdojnë pa fund e janë kthyer në makth për qytetarët, për gropat që lë pas kudo, rend t’ua kalojë, siç bën gjithmonë, përgjegjësinë të tjerëve, fajin tek viktimat. Ndërsa vrasjet, vdekjet nga aksidentet, varfëria, mjerimi, papunësia shtohen, Edi Rama vazhdon të shijojë qejfet e tij nga Nju Jorku në Paris, nga Milano në Mynih”, është shprehur Sekretari i Përgjithshëm i PD-së Arben Ristani në FB.
Por nga ana tjetër, edhe pse pa ndonjë vdekjeje të bujshme aksidentale, PD-ja ka përgjegjësi për mospërfundimin e Rrugës së Kombit në disa segmente, sidomos në atë të Kukës-Morinë, ku rruga herë është me katër e herë me dy korsi pa ndarëse. Vetëm fati bën që aty drejtuesit e automjeteve të mos lënë jetën në masë. Rruga e Kombit mbahet si krenaria e qeverisjes së djathtë, por mospërfundimi i saj e lë po aq të rrezikshme sa Lungomare-ja e papërfunduar e Vlorës. /tesheshi.com/
