Serbët asesi nuk mund ta gëlltisin faktin që shqiptarët do i shohin përmes TV-së, në kampionatin europian “Francë 2016”. Së fundmni, mediat serbe kanë filluar një fushatë të re ndaj kuqezinjve, duke kërkuar nga UEFA përjashtimin e tyre dhe, si referencë kanë marrë deklaratat e presidentit armen të futbollit, i cili dyshon se disa nga lojtarët e tij e kishin trukuar ndeshjen.
“Shokuese nga Amernia: Disa nga lojtarët tanë ishin të shitur, me ç’rast kishin toleruar Shqipërinë”, është titulli i të përditshmes serbe “Kurir”.
Edhe mediumi tjetër beogradas, “vesti-online.com”, ka cituar presidentin armen i cili dyshon tek disa lojtarë të përfaqësueses së tij.
“Lojtarët tanë na kanë tradhëtuar ndaj Shqipërisë”, ishte titulli i këtij portali, duke shkruar se UEFA duhet të hapë hetim të menjëhershëm për këtë skandal dhe shkon aq larg sa edhe parashikon përjashtimin e Shqipërisë nga Europiani.
Ditë më parë presidenti armen i futbollit, Ruben Hayrapetyan, ka deklaruar se fitorja e Shqipërisë në Jeravan përballë Armenisë (0-3), ka qenë e ndihmuar nga disa futbollistë të përfaqësueses së tij dhe se nuk do ta lejojë këtë tradhti të tyre të mbetet me kaq.
Zyrtarë të UEFA-s, kanë deklaruar se në mungesë të provave nuk do të hapin asnjë rast për hetim. /tesheshi.com/
