Edhe pas armëpushimit të njëanshëm të deklaruar nga Azerbajxhani, luftimet e nisura të shtunën kanë vazhduar.
Forcat azere kanë pretenduar se tre prej trupave të tyre janë vrarë gjatë 24 orëve të shkuara. Nga pala tjetër, zëdhënësi i Ministrisë së Mbrojtjes së Armenisë, Artsrun Ovannisian, njoftoi se milicia e Karabakut ka përparuar gjatë natës, duke çliruar pozicione të reja.
Po ashtu, sipas tij, artileria armene i ka goditur njësitë azere përgjatë frontit.
Një zëdhënës i Ministrisë së Jashtme azere i ka pohuar Al Jazeera-s se forcat armene i kanë bombarduar sërish zonat e banuara pavarësisht armëshimit të deklaruar nga Azerbajxhani.
“Në rrethana të tilla, forcat e armatosura azere janë të shtrënguara t’i marrin të gjitha masat e nevojshme paraprake për të garantuar sigurinë e qytetarëve azerbajxhanas… E gjithë përgjegjësia i mbetet republikës së Armenisë për ndërmarrjen e hapave të tillë provokues,” ka thënë zëdhënësi azer për Al Jazeera-n.
Presidenti armen, Serzh Sargsyan, paralajmëroi ditën e djeshme se çdo përshkallëzim i luftimeve mund të çojë në një luftë në shkallë të gjerë. /tesheshi.com/
