Pas tensionimit të situatës javëve të fundit dhe kërcënimit me luftë nga ana e Serbisë, nesër në Bruksel do ulen në një tavolinë për të “ulur gjakrat”, dy presidentët Thaçi e Nikoliq, dhe kryeministrat Mustafa e Vuçiq.
Por gatishmëria e palës kosovare për të vazhduar dialogun po shihet një hap i gabuar nga opozita.
Është pikërisht lideri i AAK-së, Ramush Haradinaj që vazhdon të mbahet “peng”, në Francë me një urdhër arrest të Serbisë, dhe Shpend Ahmeti i Vetëvendosje-s, që kanë hedhur kritika në drejtim të krerëve të shtetit.
Haradinaj, uljen e Thaçit e Mustafës në një tryezë me drejtuesit serb e quan pozicion të kukullave
“Që të ulësh në një tavolinë bisedimesh me Serbinë, që po i shkakton kaq shumë dëme Kosovës, kjo edhe përmes sulmeve e marifeteve të fundit, siç janë muri, treni dhe fletarrestet e sajuara, do të thotë të mos e kuptosh interesin e shtetit tënd. Të pranosh të ulesh e të dialogosh me Serbinë, në këto rrethana e në kohën e një kundërshtimi kaq të madh popullor kundër një dialogu pa kushte, do të thotë të mos e përfaqësosh popullin”, ka shkruar Haradinaj në Facebook.
Kurse, Ahmeti e shpreh çudinë se si Thaçi e Mustafa duhet të shkojnë menjëherë si t’i thërrasë Vuçiqi.
“Serbia ndërton murin, dërgon trenin dhe ngrit fletëarreste për UÇK (Ramush Haradinaj) dhe mandej thotë hajde po negociojmë për këto tema në Bruksel”, ka shkruar Ahmeti në Facebook.
Ndryshe, në takimin e nesërm drejtuesit e dy shteteve, nën drejtimin e përfaqësueses së lartë të BE-së, Federica Mogherin do të bisedojnë konkretisht për tensionimin e situatës. /tesheshi.com/
