Sot Vatikani nënshkroi një marrëveshje me zyrtarët palestinezë, duke e njohur formalisht Palestinën. Marrëveshja e bashkëpunimit, e cila rregullon çështjet e Kishës Katolike në atë pjesë të tokës së shenjtë që gjendet nën kontrollin palestinez, do të hyjë në fuqi pas ratifikimit nga të dyja palët.
Marrëveshja u finalizua parimisht muajin e shkuar, ndërsa teksti i dokumentit përfundimtar nuk është bërë ende i ditur.
Ministri i Jashtëm palestinez, Riad el-Maliki, e quajti historike marrëveshjen, duke vënë në dukje, “Marrëveshja përfshin për herë të parë një njohje zyrtare të Palestinës si shtet nga Selia e Shenjtë, në njohje të së drejtës së popullit palestinez për vetëvendosje, liri dhe dinjitet, në një shtet të pavarur të tijin, i çliruar nga prangat e pushtimit.”
Paul Gallagher, ministri i jashtëm i Vatikanit, bëri thirrje për rinisjen e negociatave të drejtpërdrejta mes izraelitëve dhe palestinezëve, për të shkuar drejt zgjidhjes së dy shteteve. “Kjo kërkon sigurisht vendime kurajoze, por gjithashtu ka për të dhënë një kontribut të madh për paqen dhe stabilitetin në rajon,” tha ai.
Marrëveshja e nënshkruar ka sjellë zemërimin e Izraelit, që e ka quajtur atë, “një hap të nxituar që dëmton perspektivën e shkuarjes drejt një marrëveshje paqeje.” Në të njëjtën kohë, u la të kuptohej se kjo mund të kishte rrjedhoja në marrëdhëniet diplomatike me Vatikanin.
Palestinën e njohin 135 shtete të OKB-së, ndërsa 160 prej tyre e njohin Izraelin.
