Vatikani njoftoi të hënën se synon të dërgojë në hapësirë një libër dixhital të miniaturës me një mesazh shprese që Papa Françesku përcolli në vitin 2020 në mes të pandemisë Covid-19.
“Nano-libri” do të hidhet në orbitë në një lartësi prej 525 km nga një raketë SpaceX Falcon 9 që do të ngrihet më 10 qershor nga aeroporti Vandenberg në Kaliforni, njoftoi Selia e Shenjtë në një konferencë për shtyp në Romë.
Një pjesë elektronike e mikrogdhendur prej 2 mm do të ngarkohet në një satelit drejtkëndor prej rreth tridhjetë cm (CubeSat) të pajisur me panele diellore që është projektuar nga studentët e Shkollës Politeknike të Torinos.
Ai do të shfaqë fjalimin që Papa Françesku mbajti më 27 mars 2020 në mes të pandemisë Covid.
Satelit i shpresës
Atë ditë kreu i kishës katolike u shfaq i vetëm në sheshin e Shën Pjetrit, të shkretë dhe të lagur nga shiu, duke i bërë thirrje botës “të frikësuar dhe të humbur” të rishikonte prioritetet e saj.
I quajtur latinisht “Spei Satelles” (satelit i shpresës), projekti, buxheti i të cilit nuk është specifikuar, do të realizohet bashkërisht nga Vatikani, Agjencia Italiane e Hapësirës dhe institute të ndryshme italiane.
Qëllimi i bashkëpunimit të tyre është të dërgojnë fjalimin e Papës “përtej kufijve të tokës, në mënyrë që nga hapësira të arrijë sa më shumë gra dhe burra në planetin tonë në vështirësi”, shpjegoi presidenti i Agjencisë Hapësinore, italiani Giorgio Saçoçia.
Në tetor 2017, Papa argjentinas foli drejtpërdrejt përmes video-konferencës me astronautët në Stacionin Ndërkombëtar të Hapësirës (ISS) si pjesë e një nisme të nisur nga paraardhësi i tij, Benedikti XVI. /tesheshi.com/
