Vatikani: Bekimi i çifteve të të njëjtit seks, jo miratimi i tyre(!!!)

Vatikani ka sqaruar vendimin që lejon priftërinjtë të bekojnë çiftet e të njëjtit seks, duke theksuar se kjo nuk është një miratim i homoseksualitetit, por as blasfemi.

Sqarimet vijnë pas reagimeve negative të disa peshkopëve katolikë.

Në dhjetor, Papa Françesku miratoi një vendim që lejon priftërinjtë të bekojnë çiftet e pamartuara dhe të të njëjtit seks për sa kohë që bekimi bëhej pa asnjë lloj rituali dhe nuk jepte përshtypjen se kisha e miraton lidhjen.

Vendimi u përqafua nga katolikët LGBTI, por shkaktoi konfuzion midis peshkopëve në disa vende, veçanërisht në Afrikë, ku disa syresh thanë se nuk do ta zbatonin atë.

Të enjten, Vatikani sqaroi se bekimi i çifteve të të njëjtit seks “nuk justifikon të gjitha veprimet e tyre dhe nuk përbën miratim të jetës që ata bëjnë”. Megjithatë, masa nuk duhet të konsiderohet “heretike, në kundërshtim me traditën e kishës ose blasfemuese”.

Priftërinjtë mund të zgjidhnin të bekonin rast pas rasti. Por ndërsa Vatikani pranoi se bekimet “do të ishin të pamatura” në vendet ku të qenit homoseksual mund të çojë në tortura, burgosje apo edhe vdekje, priftërinjtë nuk mund të zbatonin një ndalim të plotë.

Vatikani sqaroi më tej se bekimet duhet të jenë “shumë të shkurtra” (10-15 sekonda) dhe nuk duhet të justifikojnë asgjë që nuk është “moralisht e pranueshme”.

Për më tepër, Vatikani përsëriti se kur një çift i të njëjtit seks kërkon një bekim, ai “nuk duhet të jepet kurrë në të njëjtën kohë me ceremonitë e bashkimit civil dhe as në lidhje me to. As nuk mund të bëhet me rroba, gjeste apo fjalë që i përshtaten një martese”.

Dhe paçka këtyre sqarimeve, mbetet e pashpjegueshme në thelb se si mund të bekohet ajo që nuk pranohet(!!!). /tesheshi.com/