Reforma në drejtësi po has pengesa nga gjyqtarët dhe prokurorët, thotë kryetarja e Komisionit të Ligjeve, Vasilika Hysi. Gjatë një tryeze të mbajtur për zbatimin e kësaj reformë ajo i krahasoi ata me “folenë e gretëzave”. Ajo i bëri komentet në një tryezë specialistësh të drejtësisë.
“Kur kemi marrë paketën ndryshimeve kushtetuese të reformës në drejtësi kur lexonim ligjet na pëlqenin na dukeshin shumë të mira, por kur i rilexuam kuptuam se kemi futur dorën në folenë e grerëzave, pra ka shumë rezistencë pasi ka shumë nevojë për ndryshime. Shumë gjyqtarë dhe prokurorë të ndershëm i mirëpresin, por nuk kanë atë kurajon të dalin hapur dhe të thotë këto janë ligjet që ne kemi nevojë. Ndërkohë që një pjesë tjetër e gjyqtarëve e prokurorëve tamam si ato grerëzat janë sulur në të gjitha drejtimet dhe kanë krijuar një sërë vështirësish në zbatimin e kësaj reforme”, tha Vasilika Hysi.
Sipas saj një nga pickimet e këtyre grerëzave ishte vendimi i Gjykatës Kushtetuese për ligjin e statusit të gjyqtarëve.
“Vendimi i Gjykatës Kushtetuese për ndryshimin e disa neneve për zëvendësimin apo deklarimin antikushtetues të disa neneve na ka vënë në vështirësi, pasi nuk e kuptojmë çfarë kanë dashur të thonë dhe çfarë duhet të bëjmë, pra nuk jemi në gjendje të draftojmë ndryshimet që duhen, nuk dimë çfarë duhet të shtojmë”, tha Hysi.
Avokati i Popullit, Igli Totozani, i bëri apel politikës për vazhdimin e kësaj reforme. “Avokati i Popullit nxit dhe inkurajon forcat politike të shfaqin vullnet për përmbushjen dhe çuarjen deri në fund të kësaj reforme”, tha Totozani./Tesheshi.com
