Zëvendëskryetari i LSI-së, Petrit Vasili e ka krahasuar politikën e deritanishme si shkaktare e prodhimit të pesimizmit dhe regresit në vend, teksa ka bërë një krahasim me parimet e Lëvizjes Socialiste për Integrim. Këto deklarata Vasili i bëri para mediave, teksa u pyet për ecurinë e proçesit të votimit në konventën e LSI-së.
“Një politikë e cila shikon përtej interesit të ditës, që e vë interesin e qytetarëve të parin dhe çdo tjetër del në plan të dytë dhe një politike e cila në themelin e saj ka konstruktivitetin dhe pozitivitetin në të cilin ndërton ura bashkëpunimi dhe jep zgjidhje, përkundrejt një konfliktualiteti malinj, sistematik të kultivuar e stërkultivuar, i cili përveç se regresit dhe pesimizmit nuk ka prodhuar asgjë tjetër. Mendoj që linja udhëheqëse e tërë fjalës së djeshme e përshkruar nga optimizmi dhe realizmi, dhe nga mendjehapja dhe parja e të gjithë shqiptarëve si njerëz me oportunitete dhe shanse të barabarta dhe askush i përjashtuar, besoj se janë udhët e reja, shtigjet e reja, hullitë e reja ku politika shqiptare do të duhet të projektohet në vitet që vijnë”, tha Vasili.
I pyetur rreth proçesit të votimit, zv.kryetari i LSI tha se ky moment duhet të merret si shembull pozitiv për të gjitha llojet e zgjedhjeve.
“Është një proçes risi në mënyrën se si po zhvillohet, tërësisht elektronik i cili mundëson edhe një votim shumë të lehtë, por edhe një nxjerrje tepër të lehtë të rezultatit. Besoj që në këtë drejtim japim një shembull pozitiv edhe novator se si mundet që edhe teknologjia të vihet në shërbim edhe të lehtësisë së votimit, por edhe të qenësisë së kujtdo që ushtron votën e tij, në këtë rast, brenda strukturave të LSI-së, por pse jo edhe më gjerë, për sa i takon procesit të votimit në Shqipëri, proces shumë i diskutuar. Besoj ka qenë një proçes i veçantë pasi ai ka vazhduar “non-sotop”, u shpreh ai.
Ai tha se proçesi ka vazhduar gjatë gjithë natës, ndaj ka votuar rreth orës 01:30 të mëngjesit, e po kështu edhe kryetari i LSI, Meta e të tjerë.
Vasli u pyet edhe rreth një propozimi të mundshëm për të aplikuar këtë metodë votimi në të gjithën vendin, duke qenë anëtar i Komisionit të Reformës zgjedhore.
“LSI-ja për të qenë objektiv ka aplikuar votimin elektronik, numërimin elektronik edhe në konventën e mëparshme. Këtu kemi të bëjmë me një përmirësim akoma më të mëtejshme. Politika në këtë çështja ka dhënë një mirëkuptim, pasi ‘Po’ votimit elektronik i është thënë që në vitin 2012 në reformën zgjedhore të asaj kohe. Dhe është thënë dhe është ri-thënë që janë problemet teknike që e pengojnë. Kështu që dakordësia jonë si LSI ka qenë dhe është e plotë për një votim të tillë. Elementet dhe problematikat steknologjike nuk më takon mua që t’i vlerësoj”, përfundoi Vasili./tesheshi.com/
