Studiot televizive ka qenë së fundi një tjetër arenë ballafaqimi politik në distancë mes PS-së dhe LSI-së. Nga Top Story-it, Petrit Vasili shprehu sërish bindjen se partia që ai udhëheq do jetë forcë e parë, e për këtë arsye Edi Rama e humb shansin për të qenë sërish kryeministër.
“Edi Rama mori një shans për të qenë Kryeministër i Shqipërisë, shans që e humbi, shpërdoroi dhe përdhosi. Ne kemi një program “Një shans për të gjithë” dhe Edi Rama e ka deklaruar këtë vetë, e ka deklaruar këtu që do të ikë nëse nuk del forcë e parë. Ne do ja japim një shans që të ikë”, tha Vasili.
Ndërsa Rama, nga nga tjetër studio, ajo në e “Dritare”-s së Xhubgës zhvendosur në natyrë, më saktë në sheshin “Skënderbej”, tha se LSI nuk do jetë më në pushtet, e ndaj sipas tij nuk kishte më asnjë arsye për të votuar për të nga ata që e kanë këmbyer votën me vendin e punës që kjo parti u ka ofruar.
“Kush e voton atë parti për vendin e punës, apo për premtimin për punë duhet të ndërrojë qasje sepse LSI nuk do të jetë më në pushtet pas datës 25 qershor. Kjo është gjëja e vetme e sigurt pas 25 qershorit. LSI nuk do të ketë më vend, në çfarëdolloj forme që do të ndërtohet qeveria e Shqipërisë”, tha kreu i mazhorancës. /tesheshi.com/
