Është acaruar dhe më tej konflikti mes Bashës dhe krerëve të LSI-së, fill pas kreu demokrat e cilësoi këtë parti si “SHPK” (pra ndërmarrje biznesi), duke thënë se do falimentojë më 25 qershor. Petrit Vasili, alteregoja e Ilir Metës, që tashmë është nr.1 në LSI pasi shkuarjes së kryetarit historik në Presidencë, i është kthyer Bashës duke e quajtur mosmirënjohës, si ndaj Berishës e Metës po ashtu; dhe më pas e fton në duel televiziv.
“I dashur Luli, nga Kruja, nën dehjen e hashashit, më zure dhe mua në gojë.
Mosmirënjohjen ndaj Berishës dhe Metës ta njoh mirë.
E di mirë edhe që ke hequr dorë nga objektivi yt dhe i PD-së për kryeministër dhe president.
Megjithatë, për të vërtetat e shpk-ve të tua dhe shumë të vërteta të tjera, që unë di nga takime shumë të rëndësishme, meqënëse edhe kandidati tjetër nuk po ta fishkëllen, edhe në respekt të demokratëve të pres të përballemi në tv, shesh a ku të duash.
Ky, Luli, është një shans edhe për ty”, shkruan Petrit Vasili, ku me fjalinë e parë, “dehjen nga hashashi”, e godet kryedemokratin për të qënit “aleat” me Ramën tashmë, pas marrëveshjes së 17 majit.
Dhe pas ftesës këmbëngulëse për debat me Ramën, tanimë Basha sfidohet të shkojë në debat me Vasilin, pas dorashkës që i ka hedhur ky i fundit. /tesheshi.com/
