Kryetari i grupit parlamentar të LSI-së, Petrit Vasili, ka reaguar përmes një komenti në rrjetet sociale, mbi përgjigjet që kryeministri Edi Rama, ka dhënë për pyetjet që iu drejtuan në seancë në lidhje me programin e qeverisë.
Ramës iu drejtuan 19 pyetje vetëm nga deputetët e LSI dhe ato kishin të bënin me infrastrukturën, bujqësinë, integrimin, 3 sektorë që janë mbuluar nga LSI në mandatin e parë të tij si kryeministër.
Por duket se përgjigjet e Ramës nuk i kanë kënaqur deputetët e LSI-së, megjithëse seanca nuk parashikonte debate. Kjo duket se ka detyruar kreun e grupit parlamentar që kritikat t´I paraqesë në rrjet, ndërsa nesër në seancë priten të tjera reagime.
“Ky kryeministër, me aritmetikë të gremisur.
Këtë kryeministrin tonë e tallin keq edhe të vetët. Kur pyetet për bujqësinë nuk ndan dot eurot nga lekët dhe i duken barabartë, ai s’ka faj se aq di po të tijtë pse e tallin xhanëm?
E pyesin për investimet, që lidhen me rrugë dhe energjitikën dhe paratë që nuk dalin gjëkundi për premtimet e lajthitura të tij dhe ky s’kupton që buxheti i shtetit është një dhe i vetëm.
Ky e ndan buxhetin me emra ministrash si llogari shtëpie për secilin. E pyesin të ziun për ujrat e zeza në Ksamil e ky thotë që Ksamili është i Brukselit dhe jo i Shqipërisë.
E kam thënë që është shkollëpakët, po kaq pak është shumë”, shkruan Vasili. /tesheshi.com/
