Petrit Vasili, kryetar i grupit parlamentar të LSI-së, ka akuzuar kryeministrin Edi Rama për dy qëndrime krejt të kundërta në lidhje me biznesin e vogël. LSI prej ditësh akuzon qeverinë në lidhje me përfshirjen e biznesit të vogël në skemën e TVSH-së, duke e cilësuar këtë si një hap të gabuar që do të çojë në mbylljen e këtyre aktiviteteve apo në rritjen e çmimeve, që do të bien në kurriz të shqiptarëve.
Vasili ka publikuar në rrjetin social Facebook, premtimin që Rama i bënte biznesit të vogël në vitin 2015 ku i konsideronte aleatë, dhe fjalët e tij në tetor të 2017-ës, kur deklaroi taksimin ndaj tyre.
“Kryeministri mik i oligarkëve dhe armik i bizneseve të mbijetesës.
Kryeministri në nëntor të vitit 2015, kur ja hiqte të gjitha detyrimet biznesit të vogël dhe e konsideronte aleat në luftën kundër informalitetit, ja ç’thoshte:
“Rezultatin e parë të këtij operacioni jua dedikojmë juve. Nuk është se e kemi mirë arkën e shtetit, për të pasur mundësira të mëdha, por besoj se këto para duhet të shkojnë tek ju, tek të gjithë ata që vetëpunësohen. Me hyrjen në fuqi javët e ardhshme të këtij plani, ne i konsiderojmë bizneset e vogla aleatë në betejën kundër informalitetit për të bllokuar shkarkimin e paligjshëm të TVSH-së nga të mëdhenjtë”
Po ky kryeministër qesharak në tetor 2017 ja vë taksat biznesit e shndërron në ARMIK PUBLIK dhe ja ç’thotë:
“Ne duam që TVSH të mos përfundojë në xhepat e një grushti të pasurish. Mosdhënia dhe mosmarrja e faturës së TVSH-së është arsyeja pse i bëmë pjesë të skemës. Rezulton se ka disa biznese që deklarohen si të vegjël e qahen si të vegjël, por që nuk janë të tillë”.
Oligarkët me shume sinqeritet u deklaruan të kënaqur me të dytën se telekomandën e kryeministrit e kanë ata.
Pavarësisht se gjithë europa ka fasha përjashtuese për TVSH-në për biznese të vogla, shkollëpaku në emër të oligarkisë e bëri sërish Shqipërinë fanar ndriçues në Europë për diskriminimin e biznesit të vogël”, shkruan Vasili. /tesheshi.com/
