Është varrosur trupi i pajetë i të ndjerit Astrit Dehari në varrezat e fshatit Zllatar të Komunës së Prishtinës. Në ceremoni, përveç familjarëve, miqve dhe bashkëpartiakëve, morën pjesën edhe shumë qytetarë.
Pak momente para se t’i jepte lamtumirën e fundit, Avni Dehari përkundër dhimbjes së madhe për humbjen e djalit të tij, ai i falënderoi të gjithë ata qytetarë që sot iu bashkuan për t’i dhënë lamtumirën e fundit Astritit.
“Ju falënderoj nga toka deri në qiell për mundin që keni bërë për të ardhur deri këtu për të bashkëndjerë me dhimbjen tonë. Unë së bashku me familjen time jemi të vetëdijshëm se pa ju nuk do ta përballonim këtë dhimbje. Jemi të vetëdijshëm që bashkë me ju do ta mbajë kokën lartë dhe do ta vazhdojmë aktivitetin e Astrit dhe subjektit që i ka përkit me mish e me shpirt”, tha Avni Dehari, babi i të ndjerit, pak para se ta varroste të birin.
Kurti: Astriti ishte yll
Në ceremoninë e varrimit të aktivistit të tyre, disa fjalë për Astritin i thanë edhe Albin Kurti e Shpend Ahmeti.
Ish-lideri i VV-së, tha se kërkojnë drejtësi, dhe një hetim të pavarur ndërkombëtar.
Ai tha se me vdekjen e Astrit kemi humbur diellin por jo edhe dritën.
“Kemi mbetur pa diellin por jo pa dritën në këto ditë të zeza, kemi humbur diellin por kemi një natë me mijëra yje. Astriti ishte yll. Pas vdekjes ngihet jeta e kudo ushton trumbeta. Lavdi këtyre pakë viteve të jetës së Astritit. Ditët janë të zeza por netët janë të ndritshme”, theksoi Kurti, i cili bëri të ditur se Astriti priste ardhjen në jetë të fëmijës së tij.
Ahmeti: Astrit fli i qetë, s’ do të ndalemi deri sa ta qojmë drejtësinë në fund
Kurse kryetari i Komunës së Prishtinës, Shpend Ahmeti në mes lotëve ka folur për Astrit Deharin.
“Astriti na tregoi se si punohet me vetëmohim, me ideale me përkushtim. Shumë pak prej jush e dini që Astriti ishte ndër njerëzit kryesor që punoi me përkushtim për sistemin shëndetësor në Komunën e Prishtinës. Nuk e keni parë nëpër intervista, por e keni parë duke punuar pa u ankuar e pa zë”, ka thënë Ahmeti.
Ai ka shtuar se duhet të ndjeket ideali i tij për një Kosovë të pavarur, të zhvilluar, për një Kosovë që punon drejt vetëvendosjes për bashkim kombëtar.
“Astrit fli i qetë nuk do të ndalemi deri sa ta qojmë drejtësinë deri në fund”, u shpreh Ahmeti. /tesheshi.com/
