Nuk janë mbyllur ende plagët e luftës së Kosovëës për sa kohë një numër i madh qytetarësh janë ende të pagjetur dhe dyshohen se janë vrarë dhe varrosur nëpër vende të ndryshme.
Deri tani janë gjetur disa të tilla, ndërkohë që Kosova bën gati padinë për genocid ndaj Serbisë.
Instituti i Mjekësisë Ligjore të Kosovës bën të ditur se, “sot do të fillojë kontrollimi i hapësirës në pjesën veriore të urës së Ibrit”, vend ky i njohur si hapësira e xhamisë së urës së Ibrit e cila është rrënuar gjatë viteve të luftës në Kosovë.
Gërmimet në këtë lokacion do të bëhen nga ekipi i Institutit të Mjekësisë Ligjore si dhe ekspertët e EULEX-it”.
Ministria e Drejtësisë së Kosovës ka dërguar një komunikatë të posaçme për këtë qëllim, ndërsa kryetari i Komisionit Qeveritar për të Pagjeturit, Prenk Gjetaj, ka deklaruar se në qytetin e Mitrovicës, të enjten, do të fillojnë gërmimet në kërkim të varrezës masive.
Ai tha se gërmimi vlerësues nis në lokacionin e quajtur Xhamia e Ibrit, afër Urës se Ibrit në Mitrovicë.
Gjetaj tha se dyshimet për këtë lokacion për varrezë masive, kanë ekzistuar prej përfundimit të luftës, por “për shkak të lokacionit, kjo çështje është zvarritur për shkaqe sigurie dhe politike”.
Një numër i lokacioneve në Kosovë dhe brenda territorit të Serbisë, sipas autoriteteve të vendit, dyshohet të jenë vendvarreza masive në të cilat, siç thuhet, “janë varrosur trupat e shqiptarëve të vrarë gjatë periudhës së luftës”.
Edhe 1600 persona, thonë organizatat për të drejtat e njeriut, vazhdojnë të konsiderohen si të zhdukur që prej përfundimit të luftës në Kosovë, ndërkohë që familjarët e tyre kanë kërkuar nga autoritetet e vendit dhe ato ndërkombëtare që të ‘bëhet më shumë në zbardhjen e fatit të tyre’.
Gërmimet në këtë lokacion do të bëhen nga ekipi i Institutit të Mjekësisë Ligjore si dhe ekspertët e EULEX-it. /tesheshi.com/
