Rreth 200 përfaqësues nga 150 kompani funerale nga Kroacia, Greqia, Bullgaria, Bosnja, Serbia dhe Maqedonia e Veriut u mblodhën në takimin 11-të me radhë të varrtarëve nga Ballkani – “Varrezat”, në Nish. Atraksioni kryesor në event ishte një tortë në formë arkivoli e gjatë gati një metër e gjysmë.
Të ftuarit u gostitën pikërisht me këtë tortë që u servir me fishekzjarre dhe tingujt e “Marshit të Vdekjes” nën një mjegullim artificial.
Ivan Stanisavljeviç nga Nishi, organizatori i eventit, tha se qëllimi i është njohja më e mirë dhe shkëmbimi i përvojave të kolegëve.
“Qëllimi është të arrijmë bashkëpunim, që një ditë në vit të kemi edhe një frymë. Ne kemi funerale çdo 365 ditë, një ditë në vit duam edhe të pushojmë”, u shpreh ai.
Ai i ka hyrë këtij biznesi 25 vite më parë dhe tani po ia dorëzon të birit. Ai thotë se edhe pse shumë mendojnë ndryshe, drejtorët e funeralit ndjejnë pikëllimin me familjet që humbin të dashurit e tyre.
Të njëjtën gjë theksoi edhe një kolege e tij.
“Disa mendojnë se po pasurohemi jashtëzakonisht shumë, por nuk e kuptojnë se ne punojmë 24 orë në 24 në ditë dhe se jemi bashkëjetues në dhimbje. Edhe ne jemi njerëz, ndjejmë trishtim dhe dhimbje me familjen që i shërbejmë”. /tesheshi.com/
.
