Kreu i një organizate me bazë në SHBA për mbrojtjen e interesave siriane tha të hënën se një varr masiv jashtë Damaskut përmban trupat e të paktën 100,000 njerëzve të vrarë nga ish-qeveria e presidentit të rrëzuar Bashar al-Assad, raporton agjencia britanike Reuters.
Mouaz Moustafa i tha Reuters në një intervistë telefonike nga Damasku se vendi në al-Qutajfah, 40 km në veri të kryeqytetit sirian, ishte një nga pesë varrezat masive që ai kishte identifikuar gjatë viteve.
“100,000 njerëz është vlerësimi më fillestar” i numrit të trupave të varrosur aty, tha Moustafa, kreu i Task Forcës Emergjente të Sirisë.
Moustafa tha se është i sigurt se ka më shumë varreza masive se ato pesë lokacione, dhe se përveç viktimave siriane, viktimat përfshijnë amerikanë, britanikë dhe të huaj të tjerë.
Reuters nuk mundi të konfirmonte pretendimet e Moustafa.
Qindra mijëra sirianë vlerësohet të jenë vrarë që nga viti 2011, kur shtypja e protestave nga Assad-i kundër sundimit të tij u shndërrua në luftë civile.
Assad dhe babai i tij Hafez, i cili i parapriu atij si president dhe vdiq në vitin 2000, akuzohen nga sirianët, grupet e të drejtave dhe qeveritë e tjera për vrasje të përhapura, duke përfshirë ekzekutime masive pa gjyq brenda sistemit famëkeq të burgjeve të vendit.
Assad ka mohuar vazhdimisht se qeveria e tij ka shkelur të drejtat e njeriut dhe i ka përshkruar kritikët e tij si ekstremistë.
Moustafa mbërriti në Siri pasi Assad fluturoi në Rusi dhe qeveria e tij ra përballë një ofensive të rrufeshme nga opozita e armatosur që i dha fund më shumë se 50 viteve të sundimit autokratik të familjes së tij. /tesheshi.com/
