Sërish pesimist ish-ministri grek i Financave, ndërsa në Athinë pritet diskutimi në parlament i marrëveshjes më të re të shpëtimit, arritur me kreditorët pas negociatave maratonë.
Yanis Varoufakis nuk ka mbajtur asnjë rezervë, as për të inkurajuar ish-kryeministrin e tij apo edhe qytetarët grekë të lodhur me krizën financiare të vendit të tyre. “Nuk do të funksionojë”, tha Varoufakis për marrëveshjen e re me kreditorët.
Ai madje, u shpreh se edhe negociatorët që nënshkruan marrëveshjen nuk e besojnë atë.
“Ministri grek i Financave thotë pak a shumë të njëjtën gjë. Nga ana tjetër, pamë ministrin gjerman të Financave të shkonte në Bundestag dhe të thoshte se, marrëveshja nuk do të funksionojë”, ka thënë Varoufakis.
Argumentet e ish-kreut të Financave greke janë se FMN nuk është dakord me zgjidhjen që po i jepet krizës së borxhit, e dëshiron një program që merr parasysh se borxhi grek është i paqëndrueshëm.
Varoufakis u shkarkua nga detyra përpara nisjes së negociatave të ekipit grek në Bruksel, takim në të cilin kreditorët ishin shprehur se nuk do dëshironin të bisedonin me të.
Por, në të kundërt të tij, kryeministri Cipras është optimist për marrëveshjen e re, që tashmë duhet ta kalojë në parlament së bashku me një paketë reformash. Ai deklaroi se marrrëveshja do t’i japë fund pasigurisë ekonomike të vendit.
Parlamenti grek mblidhet të enjten në një sesion të jashtëzakonshëm për të ratifikuar marrëveshjen. /tesheshi.com/
