Ish-ministri grek i Financave, Yanis Varoufakis i druhet ngritjes së akuzës për tradhti ndaj tij, pasi mediat e kanë paraqitur deklaratën e tij për planin B të shpëtimit të Greqisë, si ndërhyrje të paligjshme në programin e të dhënave të ministrisë.
Sipas vetë deklaratave të Varoufakis, ndërhyrja ishte pjesë e planit për një sistem paralel ku pagesat mund të ktheheshin nga euro në dhrahmi brenda natës.
“Ne vendosëm që të hakerojmë programin softuerik të ministrisë sime, kishte deklaruar ish-ministri për gazetën Kathimerini dhe kjo ishte në dijeni edhe të kryeministrit Cipras e një ekipi të vogël njerëzish.
Varoufakis kishte rekrutuar specialistë të teknologjisë nga Universiteti “Columbia”, për të ndërhyrë në sistemin softuerik të zyrës së taksave, nën kontrollin e “Troika”-s. “Mund të bëhej një sistem funksional paralel”, deklaroi ai.
Variufakis i pyetur nga Daily Telegraph, tha se deklaratat e tij janë të sakta por janë nxjerrë nga konteksti.
“Mediat greke dëshirojnë të më prezentojnë si një ministër mashtrues të Financave, dhe të më akuzojnë për tradhti. Është e gjitha pjesë e një tentative për të anuluar të gjitha që ka arritur kjo qeveri në pesë muajt e parë”, deklaroi ish-ministri, i njohur për qëndrimin e tij të ashpër kundër masave të kursimit të imponuara ndaj Athinës në këmbim të ndihmës financiare./tesheshi/
