Nga Gjergji Koja
Proçesi i analizës në Partinë Demokratike do të pasohet nga ai i ristrukturimit të organizimit të kësaj force politike.
Burime nga PD bënë të ditur për tesheshi.com se analiza do të zhvillohet sipas degëve për rezultatin e çdo kutie zgjedhore, për të nxjerrë më pas konkluzionet dhe përgjegjësitë për strukturat, qofshin ato në nivelin e grupseksioneve, degëve apo në qendër.
Paralelisht me këtë një grup pune në PD, me asistencën edhe të ekspertëve të huaj nga Partitë Popullore Europiane, do të punojnë për gjetjen e një forme të re organizimi, çka do të thotë se do të ketë një ristrukturim të mënyrës së funksionimit të partisë më të madhe të opozitës.
“Proçesi nuk do të synojë vetëm zëvendësime emrash, por do të krijohet një qasje e re mes strukturave të partisë dhe qytetarëve, pavarësisht nëse janë ose jo anëtarë aktivë të PD”, shprehen burime nga PD.
Lulzim Basha në anën tjetër ka nisur konsultimet me forumet drejtuese të PD-së dhe aleatët. Një burim i tha tesheshi.com që nuk përjashtohet mundësia që të ketë një rithemelim të PD, ku të përfshihen edhe parti aleate, të cilat mund të jenë të gatshme të shkrihen me partinë më të madhe të opozitës.
Kjo ide është artikuluar më parë nga Fatmir Mediu, që ka hedhur idenë e krijimit të një konfederate të qendrës së djathtë, por deri më tani ajo thjesht ka mbetur si një propozim i hedhur, pa ndërmarrë hapa të tjerë.
Burimet nga PD shprehen se përgjatë kësaj jave Basha do të thërrasë mbledhjen e Këshillit Kombëtar dhe më pas Kuvendit të PD-së, ku do të përcaktohen edhe hapat që do të ndërmerren në kuadër të organizimit dhe ndryshimeve në statut.
Ajo që përjashtohet kategorikisht nga kreu demokrat është moslejimi i krijimit të fraksioneve brenda PD-së, një kërkesë kjo që është hedhur për herë të parë në 1999 nga ish-kryeministri Aleksandër Meksi, pak kohë përpara se PD të mblidhte Kuvendin e saj Kombëtar, i cili zgjidhte edhe kryetarin.
Tashmë fraksionet i kërkojnë kritikët apo kundërshtarët e Bashës në PD, por mundësitë që ata të arrijnë një gjë të tillë, janë minimale për të mos thënë zero.
Burimet nga PD shprehen për tesheshi se fondacioni gjerman Konrad Adenauer do të asistojë përpjekjet e kësaj partie për riorganizimin, duke synuar një shtrirje më të madhe horizontale dhe një tkurrje në organizimin vertikal. Kjo do të thotë se do të synohet që mes bazës së partisë dhe drejtuesve në qendër të ketë një komunikim me sa më pak hallka ndërmjetëse
Mbledhja e Këshillit Kombëtar të PD-së pritet të prodhojë të tjera debate, referuar faktit se në këtë forum numri i kundërshtarëve të Bashës është më i lartë se në kryesi. Megjithatë, shumë pak emra me peshë, që kanë mbetur aktualisht jashtë Kuvendit për shkak se nuk u përfshinë në listat e kandidatëve për deputet, janë ende anëtarë të Këshillit Kombëtar. Referuar statutit aktual, të drejtën për të qenë anëtarë të këtij forumi, e kanë ish-kryetarët e PD, ish-kryeministrat dhe ish-kryetarët e Kuvendit, çka do të thotë se Jozefina Topalli dhe Eduart Selami do të vijojnë të jenë pjesë e strukturës, pavarësisht të qenit jashtë Kuvendit apo faktit se mund të mos votohen.
Ndërkohë sot Basha ka mbledhur në një takim drejtuesit e degëve të PD-së në rrethe, mbi të cilën pritet të mbështetet për të zhvilluar analizën dhe proçesin e riorganizimit. Në një masë dërrmuese, drejtuesit e degëve të PD janë mbështetës të Bashës dhe ata përbëjnë ndoshta skalionin më të fortë të tij në partinë më të madhe të opozitës.
Por nëse do të bëhet një analizë e plotë, shumë prej tyre mund të duhet të lënë postet për shkak të rezultateve që arritën në zgjedhjet e 25 qershorit, edhe pse një pjesë e konsiderueshme e tyre janë zgjedhur në 3 vitet e fundit. /tesheshi.com/
