Nga Blendi Gashi
Presidenti Hashim Thaçi krye në vete dhe pa një unifikim me partitë tjera parlamentare të dala nga zgjedhjet e 11 qershorit pas një pauze disa mujore sot ka vazhduar dialogun me Serbinë, me ç’rast ka takuar homologun e tij serb Aleksandër Vuçiç.
Pas takimit të sotëm, Zyra e Bashkimit Evropian ka deklaruar se të dy presidentët kanë rënë dakord për fillimin e një faze të re të dialogut.
“Ata kanë rënë dakord që të punojnë për një fazë të re të dialogut në mes Prishtinës dhe Beogradit si dhe kanë vendosur që ekipet përkatëse të fillojnë të punojnë për përgatitjet. Ata gjithashtu kanë theksuar gjithashtu rëndësinë e zbatimit të marrëveshjeve të arritura në dialogun e deritanishëm”, thuhet në njoftimin e BE-së në faqen e tyre zyrtare.
Edhe Thaçi e Vuçiç pas takimit kanë theksuar rëndësinë që ka zbatimi i të gjitha marrëveshjeve të arritura deri më tani në kuadër të dialogut, që po ndërmjetësohet nga BE.
Po me të njëjtat synime dialogu mes dy vendeve nisi edhe më 2012-tën, por edhe pas pesë vitesh marrëdhëniet lëre që nuk janë normalizuar me Serbinë por ato vetëm sa janë acaruar, kujtojmë këtu provokimin me trenin rus dhe urin ilegal, por nuk duhet harruar assesi edhe deklarimet e vazhdueshme të Vuçiç që e quan Kosovën pjesë të Serbisë.
Pavarësisht kësaj, Thaçi po vazhdon rrugën e njëjtë, pra të injorimit të partive për këtë proces.
Por kokëfortësia e presidentit po kundërshtohet nga partitë parlamentare, e veçanërisht LDK-ja e Isa Mustafës thotë se presidenti po negocion për interesa personale e jo shtetërore.
Se nuk mund të ketë normalizim të marrëdhënieve mes dy vendeve dhe se rikthimi në dialog pa një platformë të qartë po shihet me rrezik nga drejtues të partive dhe analistë politikë.
Avdullah Hoti kandidat i LDK-së ka ftuar të gjitha partitë politike që t’i bashkohen partisë së tij në kundërshtimin e përpjekjeve siç shprehet jo-kushtetuese të Thacit për të marrë pjesë në dialog me Serbinë krye në vete.
“Me partitë politike në Kuvend do ta përgatisim platformën për bisedime me Serbinë pas krijimit te institucioneve. Në këtë platformë të re, dialogut do t’i japim dinamikë shumë më të ngjeshur, me afate kohore të prera, me involvim më të madh të partnereve tanë nga BE dhe SHBA, duke vendosur në tavolinë të bisedimeve të gjitha temat”, ka shkruar Hoti në llogarinë e tij në Facebook.
Kryetar i Këshillit Kombëtar të Nismës për Kosovën, Jakup Krasniqi, duke kujtuar trenin dhe murin ilegal, thotë se Thaçi e Vuçiçi në vend të normalizimit të marrëdhënieve krijuan situata kërcënimi e konflikti.
“Unë nuk mund t’ju besoj. Bisedimet duhet të lihen në duar të sigurta. Nuk mund t’i besohet mashtrimit të radhës se bisedimet mes Thaçit e Vuçiqit në Bruksel do të na sjellin anëtarësimin në BE e NATO! Nuk duhet ecur rrugës përfundimi i secilës dihet paraprakisht. Gjashtë vitet e bisedimeve në Bruksel ishin gjashtë vitet e dështimeve në bisedimet politike. Shkurt: këta president nuk mund t’i normalizojnë marrëdhëniet Kosovë-Serbi. Kot po mundohen zyrtarët e lartë të Bashkimit Evropian. Pritja është e kot”, thotë Krasniqi.
Seb Bytyqi, ligjërues i shkencave politike në Universitetin e Uinçesterit në Angli, mendon se vazhdimi i bisedimeve nga Thaçi përbën përçudnim të dialogut sepse dy presidentët kanë nivel të ndryshëm të kompetencave.
“Presidenti i Kosovës ka mandat shumë më të kufizuar se ai i Serbisë dhe i ka duart e lidhura sa i përket asaj se çfarë marrëveshje mund të arrijë. Mund të duket se dialogu po e ngrit nivelin mirëpo në fakt po dobësohet dialogu sepse marrëveshjet që arrihen e kanë shumë vështirë të votohen në Kuvend. Kështu që mund të ndodhemi në një situatë kur rritet numri i koncesioneve nga Kosova mirëpo gjasat që ato të zbatohen zvogëlohen. Dhe duke ditur mandatin e kufizuar të presidentit Thaçi, gjithashtu rriten gjasat që ai ta shkelë Kushtetutën nëse bën koncesione të reja”, thotë Bytyqi për tesheshi.com.
Analisti politik Faik Krasniqi, thotë se nga përvoja e procesit të deritashëm është dëshmuar se negocimi ka qenë jo efikas, se pushteti ekzekutiv dhe shumica prej atyre që kanë marrë pjesë në dakordimin e çështjeve politike i kanë komplikuar ato marrëveshje dhe pastaj e kanë bllokuar zbatimin e tyre.
“Dhe me kalimin e Thaçit në pozitën e presidentit dhe të Vuçiçit, po në pozitën e presidentit, i shoh në kontekst të atij dizajni në të cilin besoj që është menduar që nga fillimi nga akterët e përfshirë në proces të zgjedhur nga BE-ja dhe eventualisht edhe nga SHBA-të. Konsideroj që protagonistët kryesor që kanë filluar këtë dialog edhe do t’i japin epilog, edhe pse në fund të bisedimeve do të ketë një lloj traktati paqeje mes Kosovës dhe Serbisë, prapë se prapë ai epilog nuk do të jetë në favorin tonë”, thotë Krasniqi për tesheshi.com.
