Temperaturave të larta të këtyre ditëve në Muriqan, pikëkalimin kufitar mes Shqipërisë dhe Malit të Zi i është shtuar edhe pritja e gjatë në radhë. Një vargan prej 8 kilometrash është krijuar për shkak të ngadalësimit të punës në pikën e kalimit kufitar. Shkak për këtë ngadalësim është bërë një urdhër i ministrisë së Brendshme të Malit të Zi për kalimin në procedurë normale të kontrollit të pasaportave, nga ajo e përshpejtuar që përdorej në ditët e mëparshme.
Qytetarët thonë se me qindra makina presin në radhë për të kaluar dhe vargu sa vjen e shtohet. Ata janë kryesisht shtetas të Kosovës që jetojnë në Gjermani dhe Zvicër, por ka edhe mjaft turistë të huaj.
Dhe nervozizmi vjen e shtohet për shkak të vapës, stërmundimit të fëmijëve dhe borive të makinave që shtypen papushim nga shoferët në shenjë pakënaqësie.
Qytetarët presi një urdhër të dytë që autoritetet të koordinojnë lëvizjet drejt Muriqanit. /tesheshi.com/
