Liverpuli dhe Mançester Junajtedi do të përballen mbrëmjen e së enjtes në 1/8-at e Ligës së Europës. Eshtë ky takimi më elektrizues i tetë ndeshjeve të kësaj faze të Ligës së Europës, duke sjellë një përqendrim të vëmendjes në të.
I pyetur në prag të kësaj sfide në “Anfield” nëse e shihte Liverpulin si një “armik”, trajneri holandez i Mançester Junajtedit, Van Gaal, ka thënë fjalë për fjalë: “Nuk mendoj kështu. Mendoj se janë një kundërshtar, e ne duam ta mundim atë kundërshtar.”
Kjo është përballja e tyre e parë, ndërsa takimi i dytë do të luhet pas një jave. “Ju duhet të fitoni. Liverpuli kundër Mançester Junajtedit është gjithmonë një ndeshje e madhe, tradicionalisht, historike…”
Me Van Gaal-in në stol, Mançesteri e ka mundur katër herë Liverpulin. “Eshtë e çuditshme se e kemi mundur Liverpulin aq herë nën drejtimin tim,” ka thënë Van Gaal. “Kur unë mund ekipe si Liverpuli, atëherë vlerësimi është më i lartë. Shpresoj që t’i mundim për të pestën dhe të gjashtën herë, më shumë për tifozët se për mua.”
Van Gaal ka folur gjithashtu për veten, për mënyrën si e përjeton ai futbollin, e po ashtu si përjetohet në Angli.
“Unë dua të fitoj çdo ndeshje, dhe kur humbas jam shumë i zhgënjyer. Mund ta shihni këtë, gjuha ime e trupit është shumë shprehëse.”
“Mendoj se futbolli në Angli është shumë thellë në jetën e njerëzve. Sigurisht, e kam vënë re këtë gjithashtu në Spanjë dhe në Gjermani, por atje ishte më pak thellë se këtu.” /tesheshi.com/
