Edhe pse u komentua gjatë për faktin se Liverpool e bleu për një shifër rekord për një mbrojtës, prej 75 milion paundësh, Virgil Van Dijk vijon të tërheqë vëmendje edhe jashtë fushës së futbollit.
Shtatlarti holandez që në ditën e parë të hyrjes në klub, krijoi disa keqkupitme të vogla, pasi në fanellën me emrin e tij, fillimisht u shënua numri 4 dhe mbiemri Van Dijk, por më pas, me ndërhyrjen e vetë futbollistit, u shkruajt emri i tij, Virgil, në pjesën e pasme të fanellës së kuqe.
Të njëjtën gjë mbrojtësi e ka bërë edhe kur luante për Celtic, si edhe Southampton. Në fakt shkakun e ka bërë publik daja e lojtarit, i cili ka rrëfyer për “Sun”, vendimin e vetë holandezit.
“Virgil dhe vëllezërit e motrat e tij kanë kaluar një fëmijëri të vështirë, pasi babai i tyre i braktisi dhe ka qenë nëna që u shndërrua edhe në mama edhe në baba” – ka qenë prononcimi i dajës së futbollistit të Liverpool.
Sipas tij, ka qenë pikërisht ky fakt dhe mungesa konstante e babait të tij, që e ka detyruar lojtarin që të mos shënojë mbiemrin e “trashëguar” nga i ati në fanellë, por të vendosë thjesht emrin e tij, si për t’u hakmarrë për braktisjen që i bëri familjes.
I afërmi i futbollistit rrëfen se Virgil ka një mardhënie shumë të afërt me nënën e tij, si edhe merr “bekimin” e saj, në çdo vendim të jetës, qoftë asaj profesionale, qoftë edhe të jetës personale. /tesheshi.com/
