Marko Van Basten po përpiqet të revolucionarizojë futbollin. Përgjegjësi për Inovacionin dhe Teknologjinë në FIFA, ka aplikuar 8 rregulla të reja në një ndeshje të kategorisë së tretë të kampionatit holandez, pikërisht midis skuadrave Lise dhe Kuik Bojs.
Idetë e reja të “hedhura në treg” nga holandezi, pritet të kenë “pro”- të dhe “kundra”-t e veta, por fakt është që nga rregullat e shkruara në letër, tashmë po fillon testimi i tyre në fushën e blertë. Midis rregullave të propozuara nga ish-sulmuesi i Milanit dhe kombëtares holandeze, bien në sy mundësia për gjuajtjen e penalltive me topin në lëvizje, edhe për faulla të shkaktuara jashtë zonës së rreptësisë.
Po kështu, një ide është nxjerrja jashtë përdorimit e kartonit të verdhë dhe aplikimi i kartonit të kuq për një kohë të caktuar, pra jo përjashtim përfundimtar nga ndeshja, por i pjesshëm. Për çdo lojtar që ndërhyn ashpër, të lejohen deri në 5 faulla e më pas, nxjerrje jashtë fushe.
Po kështu, për çdo vendim të diskutueshëm, me arbitrin duhet të flasë vetëm dhe ekskluzivisht kapiteni i skuadrës dhe askush tjetër. Van Basten ka vendosur edhe reduktimin e ndeshjeve sezonale mes ideve të tij, nisur edhe nga dëmtimet e shumta që pësojnë lojtarët, për shkak të kalendarit të ngjeshur që mund të kenë.
A do të priten mirë këto ide të reja dhe sa prej tyre do të shndërrohen në rregulla, kjo është për t’u parë.
Konservatorët e futbollit, ndoshta nuk do të jenë dakord, ose mund të jenë pjesërisht dakord, por çfarë dihet është se eksperimenti filloi, e nëse ka sukses, do të aplikohet në çdo kompeticion futbolli anembanë globit. /tesheshi.com/
