Një furtunë tipike islamofobe u ngrit pas pamjeve ku Mazllam Mazllami, një hoxhë i njohur i Kosovës, nga Prizreni, merr dhuratë një Mercedez nga besimtarë pranë dhe rreth tij, me rastin e daljes në pension, pas një iftari shtruar nga hoxha, diçka krejt e natyrshme njerëzore.
Dhuratat që njeriu i bën njeriut, janë edukatë, përkorësi njerëzore, afinitet dhe afrimitet. Dhe në Islam ato kanë një vlerësim të veçantë, pikërisht për këto arsye.
Dhurata ndaj hoxhës edhe mund të mos ishte bërë publike, pra mund të mos merrej vesh nga gjindja; por fakti që u bë nuk ka asgjë për t’u diskutuar. Dhuratëbërësit apo dhuratëmarrësi, sigurisht që nuk kanë shkelur ndonjë ligj, por as ndonjë etikë publike. Nga ana tjetër, dikë mund ta ngazëllejë kjo gjë, sidozot besimtarët, e dikë tjetër jo, pa u ngacmuar fare nga ajo që ka ndodhur në hyrjen e një restoranti në Prizren. Ndaj është e vështirë të kuptohet se ç’ka dashur të thotë gazetari Valon Sylaj në një status, i cili kullon ligësi njerëzore, por dhe idotësi profesionale, me burim një islamofobi ashiqare, tipike nga ato të denja për të kujtuar frazën lapidare të Ramës adresuar asaj skote islamofobësh të Kosovës, në media e politikë, për të cilët tha se “janë idiotë”, referuar sulmeve ndaj Turqisë, me islamofobi në thelb.
Ligësisë nuk kemi çfarë t’i bëjmë, por gazetarisë së tij po.
Në statusin e tij, veç të ligut ai tenton të bëjë dhe gazetarin në qasjen ndaj hoxhës. Ligësi është pjesa tallëse, gazetari është pjesa akuzuese, e fshehur pas rreshtash kur kujton se hoxha ka kaluar një proces gjyqësor, prej së cilit gjithsesi ka dalë i pafajshëm.
Syla tenton të bëjë një lidhje mes hoxhës dhe fenomenit Siri, ikjes së dhjetra shqiptarëve atje, duke aluduar, ndryshe nga verdikti gjyqësor, se ikja e tyre ka për inspirues hoxhën. Pse, si, kur, ku, çfarë? Asnjë fakt apo provë, jo hetimore por dhe gazetareske, nuk ka për këto 5 pyetje bazë të gazetarisë, në lidhje me atë që pretendon Sylaj.
Pra, në ç’rast hoxha Mazllam ka bërë ndonjë thirrje për ikje drejt Sirisë? Kur ka ndodhur nëse ka ndodhur vërtet? Cila është ajo frazë kompromentuese në lidhje me këtë? Cili është ai fakt që provon se 1, 2, 3, 4 a më shumë shqiptarë, morrën rrugën drejt Sirisë nga thirrjet e hoxhës?
Tjetra: a ekziston ndonjë fakt se hoxha ka patur a ka organizuar struktura rekrutuese për Siri? Nëse po, ku e ka Syla këtë fakt, si e provon këtë? A ka Syla ndonjë investigim profesional mbi hoxhën Mazllam që kundërshton verdiktin gjyqësor? Nëse po, ku është ky investigim dhe çfarë faktesh janë publikuar aty?
Ja pra se pos ligësisë aty ka dhe idiotësi, ku të dyja përbëjnë simbiozën e marrëzisë te ai që i thotë vetes gazetar. Jo më kot ai bën një lloj fejtoni në statusin e tij të ligë, pa njerëzillëk, pa etikë, në finale dhe idiotik. Idiotik, pasi ekstremizmin e pretenduar ndaj hoxhës “ia provon” me gjatësinë e mjekrës dhe veshjen. Po ç’mjekër, sa e gjatë? Sa çereku i Adem Jasharit. Ç’veshje? Hoxha vishet thjesht: me xhaketë, këmishë e pantollona stofi, krejt të llojit shqiptar. Mos e ka për xhyben e imamit? Këtu idiotësia merr një tjetër përmasë, të papërballueshme.
Dhe në kësi rastesh ridimensionohet thënia lapidare e Ramës adresuar islamofobisë së shëmtuar kosovare, në media dhe mendimin publik. E shëmtuar pasi nuk është të paktën në nivelin e asaj të Ben Blushit, që gjithsesi ruan kufijtë etikë në ateizmin e tij. /tesheshi.com/
