Dy ish-pjesëtarë të qeverisë franceze, njëri si ish-kryeministër dhe tjetri si ish-ministër, do të jenë përballë më 29 janar në raundin e dytë të zgjedhjeve paraprake të socialistëve francezë.
Nga shtatë emrat që konkurruan dje, Benoit Hamon dhe Manuel Valls arritën të marrin numrin më të madh të votave, duke fituar kalimin në balotazh.
Dalja në vend të parë në parapraket e djeshme e Benoit Hamon-it ishte një befasi, ndërsa ai mblodhi rreth 36 për qind të votave të socialistëve francezë.
Ish-kryeministri Manuel Valls u rendit i dyti, me 31 për qind të votave të hedhura për të.
Duke folur për balotazhin e së dielës mes tij dhe rivalit Hamon, Valls e përshkroi votimin e ardhshëm si një zgjedhje të thjeshtë midis “humbjes së sigurt” nëse fitonte kundërshtari dhe “fitores së mundshme” nëse shpallej ai fitues.
Në çdo rast, socialistët nuk shihen si favoritë në zgjedhjet e ardhshme presidenciale, madje sugjerohet se kandidati i tyre do të eliminohet që në raundin e parë. /tesheshi.com/
