Valentino Rosi duhet të ketë një fizik të çuditshëm, sepse dëmtimi që mori në fund të gushtit, parashikohej ta linte jashtë garave për të paktën 1 muaj. Por veterani italian, deklaron se është gati të garojë që këtë fundjavë, në garën e Aragonit në Spanjë.
Mjekët kanë dhënë një “gjysëm miratimi” për rekuperimin e këmbës, por Rosi aq ka dashur dhe menjëherë “ka kërcyer” mbi motorr, duke nisur provat. “Jam jashtëzakonisht i lumtur që jam sërish mbi motorr. Mjekët më thanë se duhej të bëja pak kujdes, por nga testi i parë mbi motorr, kuptova që mund t’ia dilja. Të martën ndjeva pak dhimbje në fund të xhirove, por jam i sigurtë se do të jem më mirë në garë. Prandaj, përpara për në Aragon”, është shprehur si gjithnjë i qeshur legjenda e Moto Grand Prix, Valentino Rosi. “Doktori” siç e ka emrin e “përkëdhelisë” nga tifozët, u rrëzua keqaz gjatë provave, në datën 31 gusht dhe menjëherë kreu një ndërhyrje kirurgjikale. Pakkush e mendonte rikthimin e shpejtë të tij, por veterani me sa duket, ka ende një dëshirë fëminore të garojë, ndaj duket se i ka djegur sërish etapat. Jo më kot Valentino stërvitet me adoleshentë, të cilëve u mëson “hilet” e zanatit, për të marrë prej tyre, “urinë” e dëshirën për të fituar. /tesheshi.com/
