Një gol i Santi Mina-s katër minuta para fundit të ndeshjes i ka hequr nga duart tre pikët mbrëmë Barcelonës, të ndalur me një barazim 1-1 nga Valencia në “Estadio de Mestalla” . Blaugranasit e mbajnë ende vendin e parë në klasifikimin e kampionatit spanjoll, por ndjejnë më nga afër hapin e ndjekësve, Atletikos së Madridit dhe Realit të Madridit, duke e bërë më të ndezur luftën për titullin kampion.
Në fakt, gjithçka po shkonte mirë për katalanasit, të cilët arritën të realizojnë pas një ore lojë me anë të sulmuesit uruguajan Luis Suarez. Mirëpo vendasit e gjejnë golin e barazimit pas një aksioni të nisur pa shumë pretendime. Santi Mina shfrytëzon një pasim të Paco Alcacer-it dhe tund rrjetën e Claudio Bravo-s.
Minutat e fundit të ndeshjes nuk sollën ndryshim të rezultatit, edhe pse u karakterizuan nga sulme në të dyja portat, dhe kështu ndeshja u mbyll në barazim. Barcelona ndalet pas më shumë se një muaji, ndërsa Valencia rigjen entuziazmin e munguar me këtë pikë të fituar me mund. /tesheshi.com/
