Mediat shtetërore të Koresë së Veriut qëndrojnë të heshtura ndaj liderit Kim Jong-un, megjithëse raportet e mediave një ditë më parë thanë se shëndeti i udhëheqësit komunist ishte në rrezik serioz pas operacionit që ai iu nënshtrua më 12 prill.
Zyrtarët e Koresë së Jugut dhe të Kinës kanë shprehur dyshime në lidhje me raportet e mediave që pretendojnë se Kim është i sëmurë rëndë, ndërsa Shtëpia e Bardhë tha se po monitoronte nga afër situatën.
Presidenti amerikan Donald Trump ka thënë se raportet e Koresë së Jugut dhe SHBA nuk janë konfirmuar.
“Shpresoj që Kim Jong-un të jetë mirë. Unë kam pasur një marrëdhënie të mirë me të dhe uroj që ai të jetë mirë. Do të shohim se si është. Unë nuk e di nëse raportet janë të vërteta,” tha Trump në një konferencë për shtyp në Shtëpinë e Bardhë.
Për shëndetin e Kim Jong-un filloi të spekulohet pasi ai nuk doli në publiki më 15 prill për të shënuar ditëlindjen e gjyshit të tij, themeluesit të Koresë së Veriut, Kim Il-sung.
Zyra presidenciale e Koresë së Jugut tha se Kim duket se po kryen punët e shtetit si zakonisht dhe nuk ka informacion për thashethemet në lidhje me gjendjen e tij mjekësore.
Daily NK, një faqe interneti e drejtuar kryesisht nga njerëz që ikën nga Koreja e Veriut, raportoi të martën se Kim kishte çështje të mbipeshes, duke raportuar se shëndeti i tij ishte përkeqësuar në muajt e fundit për shkak të pirjes së duhanit dhe punës. /tesheshi.com/
