Që pas rënies në opozitë pas zgjedhjeve të 6 tetorit, PDK-ja doli në një konferencë për shtyp, ku në shënjestër pati qeverisjen e re të Kosovës me kryeministër Albin Kurtin.
Nënkryetari Shaqir Totaj dhe zëdhënësi Avni Bytyçi, ishte dyshja e cila më së shumti e goditi Kurtin për valën e ndërmarrë të shkarkimeve në institucione.
“Në mungesë të një vizioni të qartë z. Kurti si Kryeministër ka ndërmarr veprime që sulmojnë në thelb administratën e pavarur të shtetit. Për Partinë Demokratike janë të kuptueshme dhe të pranueshme veprimet ligjore e që kanë për qëllim mbrojtjen e institucionit.
Mirëpo, është më se e qartë që kjo qeveri nën petkun kinse të ligjshmërisë ka filluar një spastrim me agjendë politike brenda institucioneve të Republikës së Kosovës. Shembull është rasti i drejtorit të doganave, që kishte ardhur në këtë pozitë pas një konkursi transparent dhe të mbikëqyrur nga Ambasada Britanike, madje në kohën sa në krye të Ministrisë së Financave ishte LDK-ja”, tha nënkryetari i PDK-së, Shaqir Totaj.
Ndërsa për zëdhënësin Bytyçi, populizmi dhe improvizimi janë dy problemet e mëdha të qeverisjes së Kurtit.
“Ne kemi një qeveri pa një orientim të qartë, e cila veprimet e saja i bazon në populizëm duke e imponuar mentalitetin improvizues”, tha Avni Bytyçi. /tesheshi.com/
