Drejtori i përgjithshëm i Organizatës Ndërkombëtare për Migracionin IOM), William Lacy Swing, ka marrë pjesë në Samitin Botëror Humanitar në Stamboll, ku dhe ka shprehur mendimet e tij mbi krizën e refugjatëve, mbi vërshimin e emigrantëve në Europë.
Swing e sheh në një këndvështrim tejet pozitiv atë çka po ngjet prej shumë kohësh, duke dhënë dhe arsyetimin e tij.
Ai është shprehur në samit se vala e emigracionit drejt Europës është jashtëzakonisht pozitive për ekonomitë e kontinentit në planin afatgjatë.
“Në përgjithësi, (emigracioni) është pozitiv, sepse refugjatët sjellin shumë motivacion,” ka thënë drejtori i përgjithshëm i IOM-it.
“Shumë prej tyre sjellin një aftësi të veçantë, apo profesione të nivelit të ulët, që mbushin punëra të cilat njerëzit në Bashkimin Europian, në Shtetet e Bashkuara, në Japoni, nuk duan t’i bëjnë.”
“Ata shpejt do të jetë duke futur para në treg, shpejt do të paguajnë taksa, shpejt mund të bëhen qytetarë, e shpejt mund të votojnë. Eshtë e tëra shumë pozitive nëse e shihni së paku në planin afatmesëm. Dhe në planin afatgjatë, është e jashtëzakonshme,” ka vënë pikën ai.
Drejtuesi i Organizatës Ndërkombëtare për Migracionin nuk ka lënë pa lavdëruar dhe kancelaren gjermane për gatishmërinë për integrimin e refugjatëve.
“Thjesht mendoj se BE-ja është e ndarë në këtë çështje. Kjo e përkeqëson më tej problemin. Ne duhet të punojmë së bashkur për t’i dhënë zgjidhje kësaj çështjeje.” /tesheshi.com/
