Pas ardhjes një natë më parë të sasisë së dytë të vaksinave Pfizer për Shqipërinë, kryeministri Rama, si dhe mjekët kryesorë në ballin e luftës kundër COVID, morrën dozën e dytë në ambientet e “Air Albania Stadium”. Në këtë dozë, Rama qe sërish i pari, me misionin politik për të injektuar besim te publiku.
Në luftë me mosbesimin, dyshimin, paragjykimin, apo konspiracionizmin e theksuar politik, shefi i qeverisë tha se do bënte publike dhe treguesit e antitrupave, në përforcim të bindjes së nuk bëhet fjalë për ujë fiziologjik.
Nga ana tjetër, Rama tha se nga doza e parë nuk ka ndjerë as lodhje e as ndonjë anormalitet tjetërlloj.
Sipas tij, në shkurt planifikohet një tjetër sasi vaksinash nga Pfizer, duke bërë të mundur dhe nisjen e vaksinimit të të moshuarve, paralet këta me stafet shëndetësore.
“Dje në darkë kemi marrë konfirmimin nga Pfizer që në mes të shkurtit mbërrijnë mbi 10 mijë doza të tjera të parashikuara dhe brenda shkurtit vijnë edhe mbi 30 mijë doza të tjera, që do të thotë që jemi gati të vaksinojmë të gjithë mjekët dhe infermierët dhe të fillojmë më moshën më të thyer”, sqaroi Rama. /tesheshi.com/
