Parisi zyrtar ka shprehur një hatërmbetje karshi kryeministrit Rama, lidhur me akuzat e këtij të fundit ndaj BE, gjithashtu dhe ndaj Francës nominalisht, si një vend që mban vaksina stok dhe nuk tregon solidaritet me vende që kanë nevojë.
Këtë, i pari i qeverisë shqiptare, e tha gjatë një interviste në Open mbrëmjen e së enjtes.
Por Franca, nëpërmjet ambasadës së saj, pos që thotë se kjo nuk është e vërtetë, nis e rendit nderet financiare të BE-së ndaj Shqipërisë.
“Mbrëmë në një transmetim televiziv, Sh.T.Z, Edi Rama kryeministër i Shqipërisë, akuzoi qartë vendet anëtare të Bashkimit Evropian, për egoizëm dhe cinizëm.
Kjo ambasadë kujton se çdo vit, Bashkimi Evropian është donatori më i madh në Shqipëri me më shumë se 100 milionë euro, në sektorë të ndryshëm.
Lidhur me pandeminë, Komisioni Evropian njoftoi më 8 janar se portofoli global i BE-së prej 2.3 miliardë dozash nuk ishte vetëm për BE por edhe për vendet fqinje. Financimi u sigurua për vendet e Ballkanit Perëndimor me 70 milionë euro nga programi IPA.
Ndërsa Franca do të arrijë qëllimin e saj për 1 milionë njerëz të vaksinuar në fund të janarit, kryeministri ngriti pyetjen pse Franca duhet të ketë një stok vaksinash që nuk mund t’i përdorë, në vend që t’i ndajë me të tjerët.
Përveç natyrës së pavërtetë të këtij informacioni, por që mund të jetë shumë i ndjeshëm për mendjet e njerëzve, kjo ambasadë konsideron se nuk është e përshtatshme të sulmosh në këtë mënyrë nominative, një vend mik dhe aleat”, thuhet në deklaratën e përfaqësisë diplomatike francezë në Tiranë. /tesheshi.com/
