Vaksina kundër COVID-19 mund të jetë gati deri në fund të vitit, tha të martën Drejtori i Organizatës Botërore të Shëndetësisë (OBSH) Tedros Adhanom Ghebreyesus, pa dhënë detaje.
Ai bëri thirrje për solidaritet dhe veprim politik nga të gjithë udhëheqësit për të siguruar shpërndarjen e barabartë të vaksinës kur ajo të jetë gati, raporton Reuters.
“Ne do të kemi nevojë për vaksinën dhe ka një mundësi që ta kemi atë deri në fund të vitit. Shpresojmë që kështu të ndodhë”, tha Tedros në përfundim të një takimi të komitetit ekzekutiv të OBSH-së kushtuar përgjigjes globale ndaj pandemisë.
Nëntë vaksina eksperimentale janë pjesë e iniciativës OBSH Covax, e cila planifikon të shpërndajë dy miliardë doza deri në fund të vitit 2021.
Deri më tani, 168 vende i janë bashkuar nismës, por Kina, Shtetet e Bashkuara dhe Rusia nuk janë midis tyre.
Administrata e Presidentit Trump ka thënë se është e prirur për marrëveshje dypalëshe për të blerë vaksinën nga prodhuesit.
“Ne kemi nevojë për njëri-tjetrin, kemi nevojë për solidaritet dhe ne duhet të luftojmë virusin me të gjitha forcat tona,” tha Tedros. /tesheshi.com/
