Kryeministri Rama tha se Shqipëria ka paguar paraprakisht për sigurimin e të parës vaksinë anti-COVID që pritet të miratohet.
“Jemi në komunikim të përditshëm me BE-në, për të garantuar qartësi dhe siguri për aksesin në vaksinimin e popullsisë, duke pasur parasysh që vaksina do dalë, por sasitë s’do jenë menjëherë që të mbulojnë gjithë popullsinë e përgjithshme të Evropës apo edhe të cilitdo vend.
Të gjitha vendet kanë një strategji, ne kemi të njëjtën strategji për të filluar me kategoritë më të prekshme dhe pastaj për ta shtrirë në të gjitha shtresat e popullsisë. Është e rëndësishme që ne sot jemi gati për të pasur akses dhe po punojmë si të tjerët për të ndërtuar aleancat e duhura, sepse kështu do ndodhë me vende të tjera, që mos mbetemi mbrapa të tjerëve.
Jam optimist që BE-ja do të jetë gjithëpërfshirëse në strategjinë e vet për të garantuar vaksinimin e popullsisë, edhe rajoni ynë, edhe Shqipëria do të jetë pjesë”, tha i pari i qeverisë, gjatë një fjalimi në parlament lidhur me buxhetin 2020.
Nga ana tjetër, sipas shefit të qeverisë, në këtë buxhet është parashikuar rritja më e madhe financiare për sistemin shëndetësor në 30 vjet.
“Rritja e buxhetit të shëndetësisë në vitin 2021 është rritja më e lartë në të gjitha këto 30 vjet për shëndetësinë në një buxhet të shtetit. Plus 23.3 %, një rritje e pandodhur më parë që siç e thashë lidhet me masat e reja që do të qëndrojnë aty qoftë edhe me fuqizimin e vijës mbrojtëse për të dalë kryelartë nga kjo luftë”, theksoi Rama.
Ai qe kritik me opozitën, kur sërish tha se do e donte ta kishte krah në këtë krizë, pa iu shangur kritikave.
“Ka një opozitë, ajo jashtë parlamentare që për fat të keq edhe njëherë në 100 vjet kur bie një sëmundje mbi tërë botën dhe prek dhe Shqipërinë nuk gjen arsye dhe forcë morale për t’u bashkuar me shumicën dhe për të luajtur një rol konstruktiv, jo duke hequr dorë nga kritikat, jo nga detyra për të nxitur qeverinë në drejtimin e duhur, por mos të bëjë krimin e disinformimin e një realiteti”, theksoi shefi i qeverisë. /tesheshi.com/
