Vaksina e parë në botë kundër malarjes ka marrë dritën jeshile nga autoritetet rregullatore europiane e mund të mbroje me miliona fëmijë në Afrikën Sub-Sahariane nga sëmundja vdekjeprurëse.
Agjencia Europiane e Medikamenteve rekomandoi që RTS,S, apo vaksina Mosquirix të pajiset me licencë për përdorim tek fëmijët e vegjël në Afrikë të cilët përballen me rrezikun e infektimit nga sëmundja që mbartet prej mushkonjave.
Vaksina është prodhuar nga kompania britanike, GlaxoSmithKline dhe është financuar pjesërisht edhe nga Fondacioni Bill dhe Melinda Gates.
Janë dashur 30 vjet për të prodhuar vaksinën, me një kosto prej 565 milionë dollarësh deri tani.
Hapi i radhës është vlerësimi nga Organizata Botërore e Shëndetësisë, e cila ka premtuar të nxjerrë udhëzime se ku dhe si duhet të përdoret vaksina.
Në vijim, edhe vendet e Afrikës duhet të miratojnë vaksinën në mënyrë që të blejnë sasitë e duhura, blerje që do të financohen nga Gavi, një aleancë e formuar nga Fondacioni Gates. /tesheshi/
