Charlotte Bosanquet nga Australia, një sipërmarrëse e re nga Sydney, e la kolegjin për të filluar biznesin e saj të pastrimit, nga i cili tani i fiton më shumë se 17,000 euro në muaj.
Edhe pse në pamje të parë puna e saj mund të mos tingëllojë si një punë ëndrrash, Charlotte ka dëshmuar se edhe nga hapësirat më të pista mund të dalë një histori biznesi frymëzuese.
Ndërsa studionte, Charlotte po kërkonte një punë me kohë të pjesshme dhe rastësisht hasi në pastrimin e shtëpive të mbipopulluara me mbeturina dhe gjëra të panevojshme. Shumë shpejt ajo zbuloi pasionin për transformimin e hapësirave të braktisura dhe vendosi ta kthejë këtë aktivitet në një sipërmarrje biznesi. Ajo themeloi një kompani të specializuar në pastrimin e shtëpive të njerëzve me sasi të tepërta sendesh dhe ku pisllëku është bërë kapicë.
Kompania e saj, me qendër në Sydney, punëson nëntë punëtorë dhe Charlotte përdor pajisje speciale si maska, doreza dhe kostume mbrojtëse për të përballuar sfidat e kësaj pune. Puna e saj shpesh përfshin heqjen e brejtësve të ngordhur, feçeve dhe mbeturinave të tjera, gjë që e bën punën fizikisht të vështirë dhe mendërisht sfiduese.
Kostoja e transformimit dhe fitimet
Charlotte tarifon midis 3,100 dhe 12,300 euro për të pastruar një hapësirë, në varësi të madhësisë dhe gjendjes së saj. Pas mbulimit të shpenzimeve të biznesit dhe pagesës së punonjësve, asaj i mbeten rreth 17,000 euro në muaj. Ajo investon një pjesë të fitimeve të saj në zgjerimin e biznesit të saj dhe arriti të kursejë mjaftueshëm për të blerë shtëpinë e saj në moshën 21-vjeçare.
Sipërmarrësja ambicioze tashmë po planifikon për të ardhmen – ajo synon të zgjerojë biznesin e saj dhe të dalë në pension deri në moshën 30-vjeçare. Charlotte thekson rëndësinë e të kuptuarit të shëndetit mendor kur bëhet fjalë për gjendjen e shtëpisë së dikujt. “Shëndeti mendor mund të luajë një rol të madh, kështu që mendoni përpara se të thoni ndonjë gjë”, tha ajo.
Së bashku me projektet me pagesë, ajo ndonjëherë ndihmon falas njerëzit në situata të vështira, të cilët nuk mund të përballojnë shërbimet e saj. “Të ndihmosh njerëzit që mendojnë se nuk kanë rrugëdalje është ndjenja më e mirë në botë”, tha Charlotte, duke shtuar se ajo ka vetëm një rregull: “Sa më e pistë të jetë puna, aq më mirë”.
Charlotte Bosanquet, e cila ndiqet nga më shumë se 240,000 njerëz në TikTok, ndan momente nga jeta e saj e pazakontë e biznesit, duke treguar transformimet e hapësirave që pastron. Historia e saj dëshmon se si përkushtimi, ndjeshmëria dhe guximi për t’u përballur me sfidat mund ta kthejnë një punë në dukje të padëshiruar në një histori frymëzuese sipërmarrëse. /tesheshi.com/
